Ibra lo kir leh ngei a tum

Manchester United striker Zlatan Ibrahimovic chuan a khup hliam vangin a chawlh chen tur chiang lo mah se tun hma zawng aia chak leh ṭha zawka a lo kir leh tur thu a sawi.

Kum 37-a upa striker hi Europa League quarterfinal-a Ander­lecht nen an inkhelh ṭumin ball tauh a tumna lamah a tla sual a, khawthlang media ṭhenkhat chuan January 2018 thleng a inlan thei dawn lo ang hialin an tarlang.

United tan tun season-a goal 28 khunga club top scorer ni mek chuan, "Mi in ṭawiawmna zawng zawngah lawmthu ka sawi a, ka inhliam thu hi chanchinthar ni lo mah se hun engemaw chen chhung chu ka chawlh a ngai dawn a ni. Mahse, ka harsatna hi thil dang ang thoin huaisen takin ka paltlang ang a, a hma zawng aia ṭha zawkin ka lo kir leh ang," a ti.

A kum tam tawh vanga inkhelh chawlhsan phah hial tur anga an sawi striker chuan, "Thil chiang tak ka sawi duh chu ka chawlh hun tur chu keiman ka ti chiang ang. Tlawm mai turin ka la inpeih lo a, kan inhmuh leh thuai ka beisei," tiin khelmualah a hmel inlan leh ngei a tum.

Paris St-Germain aṭanga free transfer-a United zawmtu striker hian tun season bak Red Devils-ah contract a nei lo a, kum khat dang cham tura contract zawrh a nih mek chu a inhliam thleng hian a la ziak rih lo.

United manager Jose Mourin­ho chuan Ibra chu a chawlh chen tur hre tawh mah se Ibra chuan medical department lamah a hliam chu endik nawn a duh thu a thlen avangin a chawlh chen tur an la puan theih loh thu a sawi a, player rilru damna chu an duh ber a nih thu a sawi.