Barca leh Real inlan zan
El Clasico boruak 'hot' tak khelh zawh a ni a, zanin La Liga-ah champion tura inum mek Barcelona leh Real Madrid an inlan lehnghal dawn. Barca-in an match hnuhnung berah Real Madrid 3-2 a an hneh avangin an phur vanglai tak a ni a, zanin dar 11:00-ah Osasuna an mikhual ang.
Real-in Barca an ngam loh avangin league table-ah pahnihna an ni tawh a, match khatin an khel tlem thung. Real coach Zinedine Zidane-a'n an dinhmun a hrechiang a, "Barca ngam lo mah ila kan kutah engkim a la innghat," tiin a sawi a, zaninah chak loh a thiang tawh dawn lo.
A hming chu Messi
El Clasico meuh pawh Lionel Messi-a'n a hming chher nan a hmang a, Santiago Bernabeu-ah Real Madrid fan-te vel ṭapin goal hnih a khung. La Liga mawngphah luah mektu Osasuna lakah pawh Argentine forward hian harsatna a tawh a rinawm loh a, league match 29-a goal 31 a khung tawh hi a belhchhah a nih pawhin a mak lo ang.
Barca tan match thum khel thei lo tura hrem Neymar-a'n a hremna hnuhnung ber hman nan Osasuna a hmang dawn a, zaninah a hmel hmuh tur a awm dawn lo. Mahse, Barca-in El Clasico-ah meuh pawh Neymar tel loin an talbuai lo tih an pholang tawh a, Luis Suarez a la awm cheu bawk avangin Brazil captain tel loh vanga table mawngphaha talbuai tur team an ni lo.
Manager Luis Enrique-a'n season tawpah Barcelona a chhuahsan tur thu a tichiang tawh a, Spanish manager hi a season hmasa bera treble nomawi chawitu, season hmasaa La Liga leh Spanish Cup-a champion a ni - tun season-ah Champions League aṭangin pet chhuah an ni tawh a, Copa del Rey final lut tawh mah se Europe-ah beisei tur a neih tawh loh avangin La Liga nomawi tel loa Barca mangṭha a duh lo ang.
Ronaldo inlar hun
Zanin dar 1:00-ah Real-in Deportivo La Coruna an lenchilh dawn a, Santiago Bernabeu-a tlawm hlim club hian a zawna chak lo hmel hmuh an duh dawn lo. El Clasico-ah Real tan an thiampuipa Cristiano Ronaldo hmuh tur a awm mang lo a, zaninah a theihna pholang turin fan-ten an beisei ang.
Ronaldo-a'n La Liga kal mekah match 25 khel tawhin goal 19 chiah a la khung a, a elpui ber Messi aia match lia khel tlem zawk nichungin goal 12 ngawtin a khung tlem. Kum 32-a upa a nih tawh bawk avangin Portugal captain hi a chuai tawh nia ngai an tam a, Deportivo lakah fan-te beiseina a sang ang - hei erawh hriat reng a ṭha, Ronaldo hi Bayern Munich laka hattrick siamtu kha a ni tih hi.
Real Madrid fan-ten El Clasico-a khel chhe ber an thlang a, an thlanchhuah chu Gareth Bale a ni. Ronaldo mai piah lamah fan-te thinlung thawi dam nan Welsh winger chet ṭhat a pawimawh a, Karim Benzema lam hmaih a thiang lo bawk.
Zanin Inkhel Tur
Barcelona 11:00 PM Osasuna
Leganés 12:00 AM Las Palmas
Valencia 12:00 AM Real Sociedad
Deportivo La Coruna 01:00 AM Real Madrid