Golden State chakna Curry

NBA Playoff first round khelh mekah Golden State Warriors chuan Portland Trail Blazers 128-103 a hnehin conference semifinal an lut. Warriors-in Game 4-a hnehna an chan theih nana player langsar ber chu point 37 score-tu Stephen Curry a ni.

Nimin zing Moda Center-a inkhelah Warriors lamin bul an ṭan ṭha hle a, quarter hmasa berah point 23 zeta sang fal nghalin a hniam zawkah an ṭang lo tluan. Golden State thiampuipa Curry hi point score hnem ber a nih bakah rebound vawi sarih lain assist pariat a nei bawk - quarter hnuhnung berah hahchawlhtir a ni.

Regular season-a Western Conference hmahruaitu Warriors tan hian Draymond Green (21 points) leh Klay Thompson (19) te chu player pawimawh an ni leh a, chawn na vanga match hnih khel thei lo Kevin Durant-a'n a dam tawh tih lantir nan court chhungah minute 20 hun a hman chhungin point 10 a nei hman bawk.

Nimin zing inkhel dangah Toronto Raptors chuan series-ah 3-2 a hmahruaitu ni turin Milwaukee Bucks chu 118-93 in an hneh. Atlanta Hawks-in 111-101 a Washington Wizards an hneh ve leh tak avangin best of seven sereis-ah 2-2 a ni chiah bawk.