Mumbai Indians dangtu Ben Stokes

Indian Premier League-ah match ruk chhung zet a zawna chak hmel an hmuh hnuah Mum­bai Indians-in tlawm hmel an hmu ve ta a, an ngam loh chu tudang ni loin Ben Stokes a ni - Thawhṭanni zan khan Mumbai hian Rising Pune Supergiants chu an mikhual a, Pune club hi run thumin an chak!

English all rounder Ben Stokes-a'n run 17 chiah siam mah se Pune-in vaibelchhe 14 zet pek an huam chhan a pholang a, over li a vawmah run 21 chiah pea wicket hnih lain Hardik Pandya chu nalh zetin a 'catch out' a, Mitchell McClenaghan chu a 'run out' tir bawk.

Maha Derby-ah Pune an bat hmasa zawk a, over 20-ah run 160 siamin wicket ruk an hloh - opener Ajinkya Rahane(38 runs) leh Rahul Tripathi (45 runs) ten bul ṭan ṭha viau mah se thlawptu erawh an nei ṭha tawk lo.

Mumbai tan target huphurhawm niin lang lo mah se Ben Stokes an ngam lo a, over 20-ah run 157 chiah siama wicket riat hlohin an tlawm. Mumbai tan ṭum dang ang bawkin captain Rohit Sharma (58 runs) che ṭha mah se a team a chhanhim zo bik lo.

Zanin Inkhel Tur
Rising Pune Supergiants 08:00 pm Kolkata Knight Riders