AS Monaco an indah ṭha dawn

Zanin dar 12:15 hian Paris Saint-Germain chuan French Cup semifinal khel turin Parc des Princes-ah AS Monaco an lo mikhual ang. Semifinal lehlamah Angers leh Guingamp te nizan khan an inhmachhawn.

Monaco manager Leonardo Jardim-a'n Ligue 1 an ngaihpawi­mawh avangin player ṭhenkhat a chawlhtir tur thu a sawi a, chutih rualin chak ngei tura a naute rem­khawm a tum thu a sawi tel bawk.

PSG leh Monaco te hi tun season French football-a team inel ber an ni. April thla khan League Cup final-ah PSG hian 4-1 in an lo hneh tawh. League lamah erawh Monaco hi hmahruaitu an ni thung. Jardim-a naute hian an league match hnuhnung berah Radamel Falcao leh Kylian Mbappe te goal hmangin Lyon an hneh.

Jardim chuan, "Lyon nen kan inkhelh aṭanga ni hnih hnuah PSG kan hmachhawn dawn a, kartawpah league match pawimawh khelh tur kan nei bawk. Tun ṭumah hian Inrinni zana Toulouse kan hmachhawn tur hre reng chungin kan inrem ang. Player ṭhenkhat an hahchawlh dawn avangin chak kan tum lo tihna a ni lo a, chak turin PSG khelmual kan pan ang," a ti.

Monaco hian hum 2000 hnuaa vawi khat nan league nomawi an beisei mek a, a thlawna luanraltir an tum lo. Radamel Falcao pawhin inkhelh hmabak panga an la neih chu final anga pawimawh vek a nih thu sawi tawh - French Cup aiin league an ngaipawimawh zawk tih a chiang.

PSG manager Unai Emery-a'n Barcelona a ngam loh avangin Champions League mangṭha a ṭul a, club neitu lamin an duh bera an hlawhchham avangin league bakah French Cup champion nih hi an tihmakmawh a ni.

PSG winger Angel Di Maria chuan, "League Cup final-ah khan player zawng zawng kan khelṭha vek a, hnehna kan chang. Tun ṭumah pawh hian keini lam chuan kan ṭhat theih dan berin kan khel leh ang," a ti.