Dortmund hmachhawn tur Lahm a phur

Season tawp rualin Philipp Lahm-a'n inkhelh a chawlhsan dawn a, a hun tawp hi nomawi nena khar a duh. Zanin dar 12:15-ah Bayern Munich hian German Cup semifinal khel turin Borussia Dortmund an lo mikhual ang.

Germany captain hlui Lahm chuan, "Ka hun tawp hi a ṭha thei ang bera hman ka duh, duhthusamah chuan final khel ila, nomawi chawi ngei bawk ila tih hi ka suangtuahna chu a ni," tiin a sawi.

Kum 33-a upa Lahm chuan sawi chhun­zawmin, "Berlin-ah final vawi tam tak ka khelh tawh a, a boruak danglam leh nawm zia ka hrechiang. Footballer nih chuan cham­pion hi kan duh ṭheuh a, kan duh tipuitling tur chuan Dortmund hi kan hneh phawt a ngai," a ti.

World Cup champion a nih hnua internatonal football chawlhsantu Lahm hian club inelnaah pawh hnuhma a nei ṭha hle, tunah hian Bundesliga hmahruaitu an ni mek - League bakah German Cup nomawi a chawi leh a nih chuan a club tan nomawi 23 a chawina tur a ni ang.

Bundesliga hma­hruai­tu Bayern hian quar­terfinal-ah Robert Lewandowski goal hnih leh Thiago Alcantara goal khat hmangin Schalke 3-0 in an hneh. Dortmund hian Sportfreunde Lotte chu si thum fai bawkin an hneh ve bawk - Christian Pulisic, Andre Schurrle leh Marcel Schmelzer ten goal an khung thung.

Nizan khan Ger­man Cup semifinal leh­lamah Borussia Mon­chengladbach leh Ein­tracht Frankfurt te an inkhel tawh bawk.