Manchester Derby: Pep vs Mourinho
Zanin dar 12:30-ah Manchester City chuan Premier League match khel turin an hmelma kumhlun Manchester United an mikhual dawn a, team pahnih hi season thara Champions League khelh tum ve ve an nih avangin inkhel tur hian ngaihven a hlawh lehzual sawt ang.
City-in Premier League-ah palina dinhmun luah mekin point 64 an nei a, khelh zat inangah an hnuai chiaha awm United-in point 63 an nei thung - boruak a sang dawn tih a chiang a, Barcelona leh Real Madrid hunlai aṭanga inhal tawh Pep Guardiola leh Jose Mourinho hi boruak sanna belhchhahtu an ni lo thei lo bawk.
Inngam tawk
Etihad Stadium-a United an len hnuhnung 15-ah team pahnih an inngam tawk hle - vawi sarih ve ve hnehna changin vawi khat an inhnehtawk a, zaninah pawh an incho tawn khawp ang! City khelmuala United an len hnuhnung ber season hmasaah khan Louis van Gaal hoin Red Devils-in 1-0 in hnehna an chang a, he inkhela goal khungtu Marcus Rashford chu tun ṭumah pawh Zlatan Ibrahimovic inhliam vangin tlarhmaa United innghahna a ni ang.
United-in Ibra chhawr thei dawn lo mah se Pep chuan, "Ibra tel lo pawhin United hi team ṭha tak an la ni tho a, Jesse Lingard, Anthony Martial leh Marcus Rashford an la neih avangin an hlauhawm ngaiin an hlauhawm reng a ni," tiin a ṭawng fimkhur hle.
Tun season-ah club pahnih hi vawi hnih an inhmachhawn der tawh a, vawi khat ve ve hnehna an chang! Old Trafford-a league match-ah Pep-a'n Mourinho lakah hnehna hlado chhamin 2-1 in hnehna a chang a, EFL Cup-ah erawh United-in Juan Mata goal hmanga hnehlet ve thungin City an pet chhuak a, hei zawng zawng hi zanin inkhel hmuhnawm tur zia hrilhfiahtu an ni.
Nomawi tel lo Pep
Pep leh champion nomawi an inzui emaw tih mai tur a nih laiin Spanish manager hian English football harsatzia a tem chho mek a, tun season-ah nomawi beisei tur a nei tawh lo - manager a nih hnua nomawi chawi loa season a hman tluan hmasak ber tur a ni dawn! Pep hian Champions League a khel phak lo lehzel a nih chuan a mualphona belhchhahin a awm dawn tihna a ni a, Barca leh Bayern Munich-a sulhnu ropui tak hnutchhiahtu coach hian hei hi thlentir a duh lo ang.
Guardiola erawh chi ai angin a lang duh lo a, City boss chuan, "Kum kua club ka enkawl chhunga ka nil hmasak ber tur a ni. Mahse, he hun hi chu engtikah emaw a lo la thleng ngei dawn tih ka hria a, coaching khawvelah ka cham rei poh leh he hun hi chu ka tawng hnem ang," a ti.
Pep lu ti haitu tur erawh Arsenal laka inhliam David Silva dinhmun la chiang lo hi a ni a, hemi rual chiaha thu lawmawm erawh Gabriel Jesus a dam tawh a, Gunners laka lakchhuah ngai Sergio Aguero a dam tawh bawk. Spanish manager chuan, "Silva dinhmun a la chiang lo a, Aguero leh Jesus an khel dun thei a, kan khelh duh danah a innghat ang," tiin a sawi.
United dinhmun
Red Devils boss Mourinho chuan, "Club pahnih inkarah point khat chiah a awm a, inelna boruak a sang dawn. Mahse, City chuan Premier League chiah ngaihtuah tur an neih laiin keini chuan Europa League ngaihtuah tel a ṭul. He club hi nomawi chawi tura din kan ni a, chu nomawi kan beisei theihna lama rilru pek chu ka thlang zawk a ni," a ti a, May 5-a Celta Vigo nena Europa semifinal an khelh tur a ngai pawimawh zawk.
Portuguese manager hian khawvela player manto ber Paul Pogba a chhawr loh tur thu nizan khan a ti chiang tawh a, Marcos Rojo, Ibra, Phil Jones, Chris Smalling leh Juan Mata-te chu hliam an kawl sa an ni a, Burnley hmachhawn lo right back Antonio Valencia a lo kir dawn thung.