Pawisa thap vangin Barton hrem

Burnley midfielder Joey Barton chu pawisa thap chungchanga Football Association puhna a pawm hnuah thla 18 chhung football-a inhnamhnawih thei lo tura hrem a ni.

Kum 34-a upa Barton hian March 26, 2006 leh May 13, 2016 chhung vawi 1,260 pawisa a thap a, FA dan kalha a chet avang hian £30,000 chawitir a ni bawk.

Barton hian a thil tihsual pawm mah se an hrem hun chhung chu a rei uchuaka a hriat avangin khinlet a tum. English midfielder hi a hlawhtling lo a nih chuan a duh aia hmain football khelh a chawlhsan a rinawm.