Final lut turin Mizoramin Bengal sawp

Sub Junior National Football Championship-ah Mizoramin final lut turin nimin khan West Bengal 5-2 in an hneh.

Final hi Municipal Corporation Stadium, Calicut-ah April 28, Zirtawpnia khelh tur niin Mizoram leh Meghalaya an intum ang.

5 Star Mizoram

Mizoramin ṭan phatah J. Lalbiakliana (Valpuia) hmangin goal khung theihna hun ṭha an nei nghal a, Armed Veng South rawlthar hian chance ṭha hlah mah se minute 9-naah Valpuia corner pet chu Lalrempuia'n (Bawih-a) a volley goal.

Minute 13-naah Mizoramin ding lam aṭanga nawrin Zosang­puia'n (AB-a) lei hrula petin a tawp hmawr a bawk nalh hle.

West Bengal-in goal khung tumin an nawr a, amaherawhchu minute 22-naah Mizoramin counter attack hmangin an vaw let - Valpuia leh AB-a ten Bawih-a tan goal khung theih­na hun ṭha siam sakin goal hmahruai khungtu Ramthar Veng rawltharin Mizo­ram goal thumna a khung.

West Bengal lamin yard 30 aṭanga Sanjal Bag-a khung hmangin minute 39-naah goal khatin chhang let mah se minute khat pawh ral hmain Mizoram tan Sesawng rawlthar Lallawmawma'n box pawn aṭangin a khung ve nghal.

Second half ṭan aṭanga minute hnihna lekah Bengal beiseina titawp turin AB-a through ball pek chu Lalnusanga'n um lutin Mizoram goal ngana a khung. Kolasib Venglai rawlthar Nunsanga hian final round-ah goal nga a khung tawh.

Injury time-ah mualpho lutuk tur hliah khuh nan Osihim Ali-a'n West Bengal goal hnihna a khung a, Mizoram 5-2 in an chak.

Meghalaya an vannei

Semifinal hnuhnung zawka Meghalaya leh inelna thleng­tu Kerala te inkhelah hun pang­ngaiah goal a lut lo. Final-a North­East derby awm theihna turin extra time first half-ah Meghalaya-in goal awm chhun an khung.

Mizoram an lawm

Mizoram manager Zai­hmingthanga chuan, "Game pumpuiah kan chungnung viau a, kan game pawh a kal tluang hle. Kan ṭawngṭaina Pathianin a chhang a, kan lawm hle a ni," tiin Vanglani palai a hrilh.

Venghlui tlangval Zaitea chuan, "Mizo mipui ṭawngṭaipuina kan mamawh a, champion ngei kan tum a ni," tiin a sawi.

Final hruai thlengtu Mizoram sub junior coach hi Vanromawia a ni a, assistant coach chu H. Lalnunzira a ni.