Beisei phak bak a ni - Zotea

Mohun Bagan laka Aizawl FC chakna goal khungtu Zohmingliana Ralte chuan, an club thlen chin chu a beisei phak bak a nih thu Vanglaini a hrilh.

Mizo club hian April 30 khian Shillong-ah mualneitu Lajong an hmachhawn ang a, vawiin hian Mizo club-in Shillong an pan ang.

Aizawl FC defender Zotea chuan, "Tun season-a kan thlen chin hi beisei phak bak a ni. Mohun Bagan kan hneh takah chuan champion thei turah ka inngai a, chutihrualin engmah a la chiang lo. Nomawi chawi turin point khat chauh a tawk a, amaherawhchu football-ah chuan point khat aiin point thum hlawhchhuah awlsam zawk chang a awm," tiin point khat hmuh chu a lan dan ngawta awlsam a nih loh thu Vanglaini a hrilh.

Shillong Lajong hi I League-a Zotea bul ṭanna a ni a, Ramhlun South tlangval hian Lajong bakah hian Pune FC leh DSK Shivajians-ah te a khel thei bawk.

2014-a Mizoram Sub Junior team aṭanga bul ṭantu Zote chuan, "Aizawl FC kan danglamna chu kan inlungrual bakah mipui puihna kan hmu

ṭha hi a ni. Ka tauh goal khan ka lawm lutuk kha ka hamhaih lek lek alawm," tiin a sawi.

Bagan lama a thun kha I League-a a goal hnih khungna a ni a, Pune FC tana a khelh laiin Lajong lamah a tauh goal tawh bawk.

Aizawl FC tana I League-a la khel tluan parh player pawimawh chuan, "Defender nih chuan kan khel ve tih hre lo pawh hi an awm nawk zel a, goal ka khung takah chuan kan inkhel tih an hriat phah ang," tiin fiamthuin a sawi.