Conte Chelsea Chak Chiang

Premier League nomawi chawi turin Chelsea tan kawng thui zawh a ngai tawh lo. Antonio Conte enkawl Blues hian Thawhlehni zan khan an mikhual Southampton chu 4-2 in an hneh a, league hmahruaitu an nihna an sawhnghet.

Stamford Bridge-a inkhelah Eden Hazard leh Diego Costa ten goal khungin an club tan mellung pawimawh an phun a, defender Gary Cahill-a'n goal pawimawh a khung bawk. Saints goal pahnih hi Blues player hlui Oriol Romeu leh Ryan Bertrand te khung a ni.

Thutlukna fing

Italian manager Conte-a'n Premier League-a a season hmasa berah nomawi chawi a tum ruh hle, a ti chiang turin FA Cup semifinal-a Tottenham an hmachhawn ṭumin Hazard leh Costa te bench-ah a ṭhut chawlhtir. Wembley Stadium-a Spurs an hneh ṭum hian dam lohna vangin Cahill chu squad-ah a hming a lang lo bawk.

Chelsea player pawimawh pathum hian Southampton lakah inkhel bul an ṭan vek a, goal an khung vek bawk. Manchester United an hneh loh hnuah Blues an insiamṭha leh tawh a, FA Cup final an luh hnuah league match lamah pawh result ṭha an neih chhunzawm.

Blues hian league match 33 khelh aṭangin point 78 hmuin hmahruaitu an ni chhunzawm zel a, league match nga bak khelh tur an nei tawh loah pahnihna Tottenham aiin point sarihin an sang fal leh tawh. Nizan khan Spurs hian Crystal Palace an lenchilh a, an inthlauhna hi point liah a tla thla leh thei tihna a ni.

A goal hnem

Inkhel bul ṭan aṭangin Chelsea an hlauhawm nghal a, minute ngana lekah goal hmuh tur a awm nghal. Spain striker Costa ball pek dawngtu Hazard-a'n box chhungah laklawh nei miah loin a lirin a pet lut. Belgium midfielder hian tun season league match bikah goal 15 a khung tawh, Blues a zawm china a khung hnem ber ṭum a hmang mek.

Table laihawla awm Saints an buai zui duh bik lo, corner aṭanga ball lo kal chu Chelsea defender-ten an tauh chhuah theih loh avangin midfielder Romeu-a'n minute 24-naah hnai tak aṭangin an siphurh a sut. Champion tum Blues tan damkawr Cahill chuan chawlhlawk hma chiahin an hmahruai vawi hnih nan a tauh lut leh thung.

Second half-a bul ṭan ṭha zawk chu Chelsea tho an ni. Cesc Fabregas-a cross chu Costa-a'n a tauh lut leh nghal. Atletico Madrid striker hlui Costa hian Blues tan league match 85 a khelh aṭanga a goal 50-na chiah a ni. Goal khung tur siamsaktu Fabregas hian league-ah assists vawi 103 a nei tawh - Arsenal captain hluiin a tluk loh chu Manchester United legend Ryan Giggs (162) chiah a ni.

Chelsea tan point thum hmu turin an goal neih sa venhim a tawk tawh chungin an la duhtawk lo. Costa, Hazard leh Pedro ten mawi zeta ball an inpek kual hnuah Costa bawkin minute 89-naah an goal lina a khung, hun pekbelha Saints left back Bertrand goal khungin result a nghawng buai tawh lo - Chelsea an chak chiang.

Costa an fak

Chelsea manager Conte chuan tun season Premier League-a goal 19 khung tawh Costa a fak, goal khung chu a nuna bet tel tlat a nih thu a sawi. Costa hian season kal mekah league goal 24 khung tawh Romelu Lukaku leh Hary Kane (20 goals) te chiah tluk loh a nei.

Kum 47-a upa Conte chuan, "Striker nih chuan goal khung hi an nuna thil tel ve pakhat a ni. Costa ka fak chhan erawh a inpekna hi a ni. Ani hi chu team tan a ṭangkai a, goal a khung loh lai pawh khan kei chuan a chungah rinna ka nghat ngam, ka rin chhan chu team tan a thawhhlawk ṭhin vang a ni," a ti. Costa hian Saints laka goal a khung hma khan league match-ah a zawnin match nga ngawt goal a khung lo.

Juventus manager hlui chuan sawi chhunzawmin, "Ka naute hian kan thiltum an hrechiang. Kan duh hmu tur chuan midang kan ngaihtuah buai hman lo, a tawp thlengin rilru kan sawrbing a ngai," tiin thu thup tak chungin champion chungchang a sawi.

Chelsea hian kartawpah Everton an lenchilh leh nghal dawn a, an elpui ber Tottenham chuan North London derby-ah Arsenal an hmachhawn ve bawk dawn a ni. Manchester City an hneh loh hnuah Blues hneh lo zuitu Saints hian Hull City an mikhual ve thung ang.

Southampton manager Claude Puel chuan, "City lakah 3-0 a kan chak loh ṭum ai kha chuan ka nauten an khelṭha tawh hle. Minute ngana lekah goal chhuah mah ila kan insiamṭha thei a, player inzata inkhel kan ni nachungin Eden Hazard leh Diego Costa te kha player danglam bik an nih avangin kan chak lo," tiin Blues chak chhan chu player ṭha an ngah zawk vang a nih thu a sawi.

Saints hian 2012-13 season aṭanga Premier League an khelh leh hnuah Stamford Bridge-ah goal kua an khung tawh a, team dang zawng aiin Chelsea khelmualah goal an khung hnem.