MLS-ah Kaka a hlawh hnem ber
Major League Soccer-ah Kaka hlawh khum thei an la awm lo. Brazilian midfielder hian season khatah pound maktaduai 5.6 a hlawh a, MLS-ah kum thum chhung a zawna hlawh hnem ber dinhmun a luah ta.
MLS lama pem hlim Bastian Schweinsteiger chu hlawh hnem top ten-ah a lang a, pasarihna dinhmun luahin season khatah pound maktaduai 4.2 lai a la hlawh phak. Toronto-in player hlawhah sen hnem an inhuam tih a lang a, top ten-ah an player pathum an thawh thei a ni.
Toronto forward chhuanvawr Sebastian Giovinco chuan kum khatah pound maktaduai 5.5 hlawhin Kaka hnuai chiahah a awm a, midfielder Michael Bradley chuan pound maktaduai 5.1 hlawhin pathumna a ni a, forward Jozy Altidore chuan pariatna dinhmun luahin pound maktaduai 3.8 a hlawh.
New York City aṭangin top ten-ah Andrea Pirlo leh David Villa an lang a, Italian midfielder Pirlo hian pound maktaduai 4.6 a hlawh laiin Villa hian pound maktaduai 4.4 a hlawh thung.
Player langsar zingah Ashley Cole chu hlawh hnem top ten-ah a lang phak lo a, England international defender hlui hian season khatah £294,283 a hlawh.
MLS hlawh hnem top ten
Hming Club Hlawh Zat
Kaka (Bra) Orlando City £5.6m
Sebastian Giovinco (Ita) Toronto £5.5m
Michael Bradley (US) Toronto £5.1m
Andrea Pirlo (Ita) New York City £4.6m
David Villa (Spa) New York City £4.4m
Giovani dos Santos (Mex) LA Galaxy £4.3m
Bastian Schweinsteiger (Ger) Chicago Fire £4.2m
Jozy Altidore (US) Toronto £3.8m
Clint Dempsey (US) Seattle Sounders £3m
Diego Valeri (Arg) Portland Timbers £2m
£ = pound m = maktaduai