Semifinal-a inhmachhawn tur a hriat dawn ; Zaninah Khatla TBL Vs Tuikual South

Mizoram Super League Season 3-ah Zarkawt BCA, Mis­sion Veng Vikings, Tuikual South BC leh Khatla TBL ten semifinal an khel dawn tih a chiang tawh a, inhmachhawn tur erawh zanina Khatla TBL leh Tuikual South te inkhelh zawhah a chiang ang.

Zanin dar 7:45-a Hawla Indoor Stadium-a inkhel tur hi MSL2 final-ah an intawng tawh a, Khatla TBL an chungnung zawk. Tun ṭumah hi chuan nomawi an inchuh dawn lo a, semifinal-a an khingpui tur an thlang dawn. Chak lo zawkin league hmahruaitu Zarkawt BCA an hmachhawn ang a, chak zawkin Mission Veng Vikings an khelhpui thung ang.

TBL lam hi

Vawi hnih champion tawh Khatla TBL-in MSL3-ah a lungthu kim nana nomawi chawi leh ngei tumin player ṭha American player Chris Solomon bakah Vishesh Bhriguvanshi leh Garry Gill te la lutin season hmasa lama an Mizo player ṭhate chelh mah se match li an khelh tawhah a zawna vawi hnih chak pawh an la nei lo.

Champion lai TBL hian an match hnuhnung bera Mission Veng Vikings an hneh loh avangin relegate thei dinhmunah an ding hman a, amaherawhchu TBL khingpha thei tur Chanmari Hollow BBSP chu Zarkawt BCA-in an hneh avangin H. Laldinsanga hoten harsatna hranpa tawk loin semifinal an lut.

Tuikual South hmachhawn turin TBL-in ONGC aṭanga an hawh Vishesh an chhawr thei dawn lo a, American player Solo a dam chiang lo. Champion lai tana state pawn player awmchhun chu Garry Gill a ni a, Mizo player-te an penchhuah a ṭul dawn a ni.

Khatla TBL manager Lal­awm­puia Pachuau chuan, "BCA emaw Vikings emaw pawh ni se tum châk zawk kan nei lo a, kan tum chu champion a ni a, chumi tur chuan kan khelhpui apiang hneh hi kan duh a ni. Semifinal lut chiang tawh mah ila Tuikual South nen chak tumin kan khel ang," tiin Vanglaini a hrilh.

Amjyot tel lohna

Tuikual South-in Mizo hlanga khel Zarkawt BCA an hneh loh hnuah Zarkawt Serpents leh Chanmari Hollow BBSP te an hneh a, an chak pahnihah hian Amjyot Singh chu player pawimawh a ni.

Phengphehlep match hnu­hnung berah Amjyot tel loin Mission Veng Vikings an hneh lo a, zanina Khatla TBL an hmachhawn hunah Amjyot an la chhawr thei dawn chuang lo. Tuikual South hian MSL champion an tum a nih chuan feet ruk leh inches riata sang Amjyot tel loa an khelh ṭhat a ṭul dawn a, Palpreet Singh Brar an la neih tho avangin hlauh­thawn tur a awm lo bawk.

Tuikual South coach KC Lal­­lian­­tluanga chuan, "Chak tumin kan match apiang kan khel a, Vikings kan hneh loh ṭum khan inhliam vangin MS-a kan chhawr thei lo a, kan tawrhna chen pawh a awmin ka hria. TBL hmachhawn turin MS-a kan chhawr thei tawh dawn a, hnehna chan ngei tumin kan khel ang," tiin result ṭha neih turin Mizo player an pawimawh tih a sawi thung.

Zanin Inkhel Tur
7:00PM Khatla TBL Vs Tuikual South BC
April 28, Zirtawpni
7:00PM Zarkawt Serpents Vs Chanmari Hollow BBSP
# TEAM Pld W L Pts GF GA GD
1 Zarkawt BCA 5 5 0 10 400 346 54
2 Mission Veng Vikings 5 3 2 8 348 325 23
3 Tuikual South BC 4 2 2 6 335 317 18
4 Khatla TBL 4 2 2 6 260 279 -19
5 Chanmari Hollows 4 1 3 5 297 313 -16
6 Zarkawt Serpents 4 0 4 4 248 308 -60