Elpui laka Sanchez hralh tum lo Wenger

Arsenal manager Arsene Wenger chuan a player duhlai Alexis Sanchez chu Premier League club dang lakah an hralh loh tur thu a sawi chhuak.

Kum 28-a upa Sanchez hian tun season-ah Arsenal tan legaue-ah goal 19 a khung tawh a, FA Cup semifinal-a Manchester City an hnehna goal pawimawh a khung bawk. Chile international hian season awm leh tur tawp thleng daih bak a club-ah hian contract a nei tawh lo a, pawtsei tura an sawmna a hnar rih.

Wenger chuan, "Chiang taka ka sawi theih chu Premier League club dang lakah Sanchez hi kan hralh lo ang. Ka beisei dan chuan kan hnena hun rei zawk cham turin contract thar a ziak ngei ang," a ti.

Gunners manager hian season tawp thleng daih bak contract a nei lo a, kum hnih dang pawtsei tura club lamin an dawrna chu a la pawm bik lo.

Kum 67-a upa Wenger chuan, "Season tawp thleng hian tun hun leh kan hma lam hun a tan hna ka thawk phawt ang. A pawimawh ber chu mimal hma hun ni loin club hma hun a ni zawk," tiin a sawi.