Villarreal lakah Atletico an tawlhthlu
Atletico Madrid-in season thara Champions League khelh ngei an tumna kawngah daltu an tawng a, an mikhual Villarreal lakah 1-0 in an tlawm.
Season thara Wanda Metropolitan lama insawn tawh tur Atletico-in khelmual thara an inlan hmain Vicente Calderon-ah match thum chiah khelh tur an nei tawh a, hei hi Atletico fan-ten hre reng chungin an khelmuala hlawhtlinna an lo chhar tawh tam tak banner nen an pholang a, mahse hun tawp dawna Roberto Soriano goal khung vangin an tlawm.
Chhandamtu Fernandez
Mikhual team tana chak harsatna hmun Vicente Calderon-ah rinlawk ang ngeiin Villarreal goalkeeper Andres Fernandez a langsar a, inkhel ṭantir lamah Angel Correa pet goal ngei tur nia lang ṭha zeta a dan sak hnuah Saul Niguez chuan a hun ṭha neih a khawhral bawk.
Atletico-in goal khung an tum chhunzawm a, Fernandez-a'n a hna ṭha takin a thawh chhunzawm reng bawk. Kum 30-a upa goalkeeper hian Antoine Griezmann leh Nico Gaitan te pet goal ngei tur ni a lang a dang a, Simeone-a'n Yannick Carrasco leh Kevin Gameiro te tlanluhtir mah se goal an keng tel bik lo.
Villarreal tan Soriano
Madrid khaw club-in mualneitu an ni tih pholangin Villarreal tlarhnung rum ṭhaih reng mah se an mamawh goal an hmu thei lo a, substitute Fernando Torres-a'n a hun ṭha neih a khawhral hnuah Jose Gimenez-a shot chu Fernandez bawkin a dan sak.
Yellow Submarine (Villarreal sawina) an beidawng duh bik lo, captain Soriano-a'n minute 72-naah a vawi khat nan Atletico keeper Jan Oblak tan hna a siamsak a, Slovenian keeper tan dan harsa a ni lo. Hun tawp nan minute riat chiah a awm tawh tihah erawh Oblak-a'n Soriano a dang nawn lo - Italian midfielder hian Cedric Bakambu hnen aṭanga a ball hmuh chu chakna goal ni turin a khung.
Inkhel Chhehvel
Villarreal-in Atletico an tawn hnuhnung parukah vawi khat chiah tlawm hmel an hmu a, Thawhlehni zana goal an chhuah loh leh chiah hian La Liga chanchina Atletico laka match li chhung a zawna goal chhuah lo thei hmasa ber an ni nghal bawk - Villarreal hian tun season La Liga-ah match kaw chhung chu goal chhuah loin hun an hmang tawh.
Atletico-in Villarreal an ngam loh chiah hian inelna hrang hranga match 11 chhung tlawm hmel an hmuh tawh loh chu a tawp a, February hnua ngam loh an tawn lehna hmasa ber a ni. Atletico chhuanvawr Griezmann-a'n Villarreal a hmachhawn tawh vawi 12-ah goal a la khung lo a, La Liga club zingah heti zat hmachhawna goal khung lohna club a nei lo!
Final pali!
Villarreal lakah Atletico an tlawm a, manager Diego Simeone chuan an league match hmabak pali chu final ang vek an nih tawh thu a sawi! Argentine manager chuan, "Tunah chuan final pali in min hmuak ta a, eng nge kan an chiah dawn tih chu kan hre thuai ang," a ti a, league-ah tlawm hmel hmuh a duh tawh lo.
Simeone chuan an chak loh erawh thiam taka pawmin, "Hei hi football chu a ni. Zanina kan game khelh angah khan vawi tam tak hnehna kan lo chang tawh a, zaninah erawh ball khan goal-a luh a duh lo em ni chu aw tih mai tur a ni," tiin chak phu zawk mah se a chang chuan chak lo zawka ṭan a ṭul chang a awm thu a sawi.