Thunder hnehin Rockets an tlang
NBA playoff inkhel pawimawhah James Harden-a point 34 score hmangin Houston Rockets chuan Oklahoma City Thunder 105-99 in an hneh a, best of seven series-ah 4-1 a hmahruaiin Western Conference first round an paltlang.
Nimin zing inkhelah Thunder tan Russell Westbrook chuan point 47 a score bakah rebouds vawi 11 lain assist ṭum kua a nei bawk. Mahse, NBA Most Valuable Player tura rinkai Westbrook hi a ṭhian ten an thlawp ṭhat loh avangin a chak lo zawkah an ṭang.
Game 3 an khelh thlenga vawi khat chiah la chak ve Thunder lamin chetsual a thiang tawh lo tih hriain thapui an thawh a, quarter thumna an khelh zawhin 77-72 in hma an hruai. Amaherawhchu, quarter hnuhnung ber tir lamah Rockets tan Lou Williams chuan point 10 zet rawn neiin a team hi dinhmun ṭhaah a hlangkai leh ta a ni.
Rockets hian San Antonio Spurs leh Memphis Grizzlies te inkhel a chak zawk zawk an hmachhawn leh ang. Grizzlies hian Spurs lakah 3-2 in hma an hruai mek - Zirtawpni zing dar 7:00-ah Game 6 an khel ang.
Nimin zing inkhel dangah Utah Jazz chuan 96-92 in Los Angeles Clippers an hneh a, Jazz hian series-ah 3-2 in hma an hruai ta. Game 6 khelh hun tur chu Inrinni zing dar 8:00 a ni. Hemite pahniha a chak zawk hian conference semifinal-ah chuan Portland Trail Blazers hnehtu Golden State Warriors an hmachhawn ang.