Aizawl FC kutah nomawi a la awm lo

Season liam taa I League aṭanga relegate Aizawl FC ban phakah nomawi a awm tawh. Season khat chhung leka Mizo club hmasawnna hian mak tih a hlawh a, thawnthu tawp dan tur pawh mi tam zawk chuan suangtuah dan chi khat chiah an nei a, amaherawhchu a tak ramah chuan kawng hnih a awm - hlimna leh ṭahna.

Mizo mipuiin Aizawl FC ṭawi­awm turin Shillong an pan dawn a; amaherawhchu nomawi hi sual chhuah a la ngai tih an hriat reng a ṭul.

Pathianni zan dar 7:05 khian JN Stadium-ah Shillong Lajong-in Aizawl FC an mikhual ang a, he match rual chiah hian Mohun Bagan-in an mualah kai thar Chennai City an hmachhawn bawk ang.

A tak ram chu
Aizawl FC-in Kolkata club lian Mohun Bagan chu Mizoramah an thal a, goal khat chauha an hneh avangin Mariners hi tho leh theiah an siam thung.

Mizo club-in Zohmingliana Ralte hmanga goal an khung hnuah hun tawp dawnah chak theihna hun ṭha an nei a, an hmang ṭangkai lo. Mizo mipui lawmna kha hlimna tur dik a ni a, amaherawhchu tha thlah erawh a thiang lo.

Mohun Bagan-in Rabindra Sarobar Stadium-ah AFC hi 3-2 in an hneh ve tawh tho a, club pahnih hi head to head-ah chungnung an awm lo. I League danah chuan inelna pumpuia goal difference en leh tur a ni a, hetah tak hian Mizo club aiin Bagan an ṭha zawk.

Aizawl FC leh Bagan inkarah point thum awm mah se Mizo club-in an match hnuhnung bera Shillong Lajong an hneh loh a, Mariners-in an mualah Chennai City an hneh si chuan Kolkata club an champion dawn. Hei hi a tak ram chu a ni a, thil thleng thei a ni.

Inlehthalna hmasa chu
I League hmaa India rama football inelna sang ber chu National Football League a ni a, he inelna ṭan kum hian Churchill Brothers chu champion turin an dinhmun a ṭha hle.

Churchill hian champion turin match hnuhnung bera Indian Bank hneh bak an mamawh tawh lo a, amaherawhchu match hnuhnung berah Goan club beiseina a thamral. Tamil Nadu club Indian Bank hian Churchill an chelh a, Punjab club JCT FC-in hun ṭha bawhpelh loin 1996-97 NFL-ah an champion daih.

Beisei nei Bagan
Aizawl FC an hneh loh zawhah Mohun Bagan coach Sanjoy Sen chuan, "Champion turin beiseina kan la nei a, kan tihtur chu kan match hnuhnung bera Chennai City hneh a ni. Season liam taah kha chuan kan champion thei dawn lo tih kan hriat aṭangin Federation Cup-ah rilru kan pe a, kan champion phah reng a ni. Kuminah erawh kan la champion thei a, I League-ah chauh rilru kan pe ang," tiin beisei an la neih thu a sawi.

Kolkata club khingpui tur Chennai City hi I League club kai thar an ni satliah lo a, sum hmanga inlei tling an nih avangin tun season bikah an relegate thei lo. Season tawp lama ṭan chhan tur nei tawh lo Tamil Nadu club hi an tha a ṭhum tawh niin a lang a, an match hnuhnung berah Churchill Brothers chu khualmualah 1-6 zetin an hneh lo.

Bagan hian an mualah record ṭha tak an nei a, Mumbai FC an draw tih loh chu an hneh vek. Hei vang hian Mariners tan Chennai City hneh hi harsa niin a lang lo.

Kim loin AFC
Aizawl FC-in Mohun Bagan an hmachhawn hma khan an player zinga pahnih captain Alfred Kemah Jaryan leh Ashutosh Mehta ten yellow card pathum an hmu tawh a, vanduai thlak takin inkhelh laia yellow card hmutu pahnih chu Alfred leh Ashu te an ni.

Mizo club-in Shillong Lajong an hmachhawn hunah mid­fielder ṭangkai Alfred Kemah Jaryan leh mamawhna hmun apianga hman theih Ashutosh te an chhawr thei dawn lo - AFC tan channa nasa tak a ni.

Away record ṭha lo
Aizawl FC hian RG Stadium-a match kua an khelh aṭangin point 25 an hlawh chhuak a, khualmuala match riat an khelh aṭangin point 11 chiah an hlawh chhuak thung.

Khualmuala Mizo club record hi chhuan tur a awm lo a, tun season-a an point hlohna hmun Chennai, Kolkata leh Bengaluru te ai maha inkhelh harsatna hmun tia hriat lar chu Shillong hi a ni!

Tun thlenga Lajong-in I League an la khelh theihna chhan hi an muala record an neih ṭhat ṭhin vang a ni. Season liam ta pawh khan Aizawla Mohun Bagan hneh vanga phur hluai Aizawl FC chu Lajong-in Shillong-ah 3-1 in an sawp.

A hmasa ber!
North East aṭanga I League khel hmasa ber chu Shillong Lajong an ni. Bul an ṭan aṭanga tun thlenga Mizo player an chhawr tam avangin Mizoram nen inṭhian ṭha mah se, an hlutna a tlakhniam theih avangin Aizawl FC hi North East aṭanga champion hmasa ber ni turin an phal lo tawp ang.

Shillong Lajong coach Thangboi Singto chuan, "Aizawl FC hian nomawi an la chawi lo a, an kawng sialsak pawh kan tum lo a, champion kawng erawh kan tihharsat sak thung ang," tiin Mizo club a vau lawk.

I League tawp dawnah hian Mizo mipui hlim theih dan turin kawng sial a ni tawh a, amaherawhchu Kolkata mipui beiseina hi a la mit lo. Inelna tawp hma chu Mizo club leh mipuiin tha an thlah loh a ṭul a ni.