Futsal referee training nei; Vawiin entry fee pek tawp ni

Nimin khan Mizoram Football Association chuan Futsal Match Official Training an buatsaih a, MFA referee ni tawh sate bakah, Futsal Introductory Workshop chhimtu zinga mi 40 chuang an ko khawm.

MFA Office-a futsal dan leh hrai inhrilh hriatna leh FIFA dan anga futsal kalpui tura inbuatsaihna hun hi MFA Technical officer Danny Lalduhawma'n a kaihruai a ni.

Entry fee pek tawp ni

MFA chuan Mizorama a vawi khatna turin LM Store Mizoram Football Asso­ciation Futsal Cup 2017 chu May 4 aṭang hian a buatsaih ṭan dawn a, vawiin hi entry fee pek tawp ni a ni tawh a, entry fee Rs 500 hi MFA Office, City Park leh LM Store, Temple Square-ah pek theih a ni.

Inelna hi May 4 aṭangin Rajiv Gandhi Stadium-ah khelh ṭan tur a ni a, futsal inelna pangngai bakah veteran category (above 35) siam tel a ni a; a tawp lamah indoor stadium-ah luh theih beisei a ni a, television lama pek chhuah tura ruahman a ni.

Inelnaah hian champion-in Rs 50,000 an dawng dawn a, veteran-a champion pawhin Rs 10,000 an dawng ang.

May 2-ah Kickoff

May 2 hian Hawla Audito­rium-ah kickoff neih a ni dawn a, he hunah hian Futsal Laws of the Game zirna hun neih tur a nih avangin team tin aiawh pahnih tel ṭheuh tur a ni.

MFA Futsal Cup 2017-ah hian tu tan pawh tel theih a ni.