Palace ngamtu Spurs an kal zel
Tottenham Hotspur-in Premier League nomawi chawi turin Chelsea thlahfal lutuk an duh lo a, an khaw club tan 'ngaimawh tham' an ni tih pholan nan Crystal Palace lakah 1-0 in hnehna an chang.
Selhurst Park-a inkhelah Chelsea, Arsenal leh Liverpool hneh thei Palace an khel ṭha a, an hna goal venhimah an chian miau avangin Spurs tlarhmain an su hawng hleithei lo. Mahse, minute 78-naah Spurs tan Christian Eriksen a inlar a, Danish midfielder hian yard 30 vela hla aṭangin goal ropui a khung - Palace an tlawm a, chanchin lawmawm lo dang an neih belh chu hliam vangin defender Mamadou Sakho chu lakchhuah a ni.
Tottenham-in league match khelh tur hmabak panga chiah an neih tawhah point 74 an hmu a, an club chanchina Premier League-a point an hmuh san ber ṭum 2012-13 season-a point 72 an hmuh chu an khum ta - a aia sang zawk nomawi an la beisei.
Spurs sulhnu
Tottenham-in season duhawm tak an hmang mek a, Palace laka hnehna an chan chiah khan October 1960 (13) hnua league match riat chhung a zawna hnehna an chan hmasa ber a ni a, an record hmasa zawk nihrual tur erawh hi chuan an hmabak match-ah an chak vek a ṭul tawh thung.
Tun season Premier League-ah goal 100 aia tam khung thei club pathum chiah an la awm a, Spurs hian Palace laka goal an khung khan Manchester City (105) leh Arsenal (106) huang chhungah an awm ve chiah a ni. Eriksen-a'n Spurs tan harhtharna a chang mek a, inelna hrang hranga a match hnuhnung 12-ah goal nga khungin assist 11 a nei thei - Spurs champion tumna kawngah a pawimawh zel ang.
Poch thukhawchang
Tottenham boss Mauricio Pochettino chuan, "Awihawm loh khawpa ṭhain kan khel a, a bik takin second half-ah khan first half aiin kan khel ṭha zawk. Chawlhlawk hman a nih hma kha chuan kan tan hmun awl insiam a harsa em em a, mah se second half-ah insiamṭhain Palace kha kan nawr tawm tawlh tawlh a ni," a ti.
Argentine manager chuan sawi chhunzawmin, "Point thum hmu chunga nomawi kan la beisei theih avangin a lawmawm takzet. Kan tana chona phurawm ber chu beidawng loa kal zel hi a ni a, hnehna chan hi chu engtikali pawhin a nuam a ni," tiin a naute khelh danah a lawm hle.