Sub Junior Final-ah North East Derby

Vawiin tlai dar 3:45 hian Municipal Cor­poration Stadium, Cali­cut-ah Mizoram leh Me­gha­laya ten Sub Junior National Football Cham­pionship final an khel dawn.

Mizoram hi Group A hmahruaitu an ni a, Meghalaya hi Group B-ah awmin an chak fai vek. North East state pahnih hian champion khelh phu khawpin an khel ṭha ve ve a, an record thlirin final duhthusam a ni.

Champion rinkai

Mizoramin final round lut turin Manipur hneh tawh mah se an hmaah Meghalaya an hneh tawh avangin NorthEast state-a team ṭha ber an la ni lo.

Calicut-ah Mizoramin Uttar Pradesh (3 -0), Madhya Pradesh (2-0) leh Odisha (5-2) te an hneh a, group match hnuhnung berah inelna thlengtu Kerala nen 2-2 in an inhnehtawk. Final lut turin Mizoram hian semifinal-ah West Bengal 5-2 in an hneh leh bawk.

Nomawi inchuhnaah hian semifinal-a inhliam vanga lakchhuah right back Obadia Lalram­tlei­zuala chhawr theih a rinawm loh a, amah­erawh­chu Kerala nena an inhnehtawk ṭuma hrem vanga khel thei lo Lengpui rawlthar Lalrokima'n semifinal-ah Mizoram midfield a luahlum leh tawh a, final-ah pawh player pawimawh a ni ang.

Chetsual theihna Meghalaya

Meghalaya-in final lut turin an khingpui West Bengal (4-1), Goa (3-0), Delhi (4-0) leh TamilNadu (12-0) te an sawp vek a, semifinal-ah Kerala chu extra time-ah 1-0 a hneh lehin Bengal laka goal khat an chhuah chiah hi inelna puma an goal chhuah awmchhun a la ni.

Mizoram manager Zai­hmingthanga chuan, "Meghalaya hi team ṭha tak chu an ni a, amah­erawhchu keini aia an ṭhat zawkna ka hmu lo. Hneh theih tur team an ni a, final a nih avang erawh chuan chetsual theih a ni. Mizo mipui ṭawngṭaipuina kan mamawh a ni," tiin a ṭawng fimkhur hle.