Arsenal beiseina a nung zel

Arsenal chuan season thara Champions League khelh an beiseina thi ṭep tawh an chhem nung thar zel. Nilaini zan Premier League inkhela Gunners-in point thum an hmuh theih nan hun tawp dawna Leicester City defender Robert Huth own goal a tawk, 1-0 in an chak. Tla thei dinhmuna ding mek Sunderland chu Middlesbrough lakah si khat faiin an tlawm bawk.

Gunners hian kum 1994 aṭang khan league match bikah Leicester hi vawi 21 an hmachhawn tawh a, chak loh an la nei ngai lo. Season kal laiah North London club hian hun tawp hma minute 30 chhungin goal 29 an khung tawh, anni aia khung tam an awm lo a ni.

Emirates Stadium-a inkhel­ah Arsenal lamin ball chang tamin inkhel thunun zawk mah se goal an khung thei bik lo. Alexis Sanchez-a'n keeper Kasper Schmeichel chauh a hmachhawn tawhah ball a pet tur Huth-a'n a thai per sak hman. Nipui transfer laia Gunners lakluh tum Jamie Vardy leh Riyad Mahrez ten Petr Cech an paltlang zo bik lo.

Hun tawp hmain minute li chiah a awm tawh a, playmaker Mesut Ozil-a ball pass chu defender Nacho Monreal-a'n Foxes goal lam hawiin a hlap pawp, Chelsea defender hlui Huth chuan a awmin an mahni lamah a dang pial lut - ball hi khawih loin kal tlang ni se goal ban hrula kal tur a ni.

Leicester defender Christian Fuchs-a'n Arsenal forward Sanchez chu ball-a a theh per avangin a tlu a, referee Mike Jones chuan Sanchez hi na der nia ngaiin yellow card a pe - Chile international hian Fuchs ball theh tur hi ṭum hnih a chhaih buai a, hun tawp hnaih lamahboruak a nun thar phah hle. Football Association dan ang chuan 'pla­yer-in ball a theh dawnin an khing­pui player chu meter hnih aia hnaiah a awm tur a ni lo' tih a ni.

Beiseina nung

Inkhelh ṭan hmain Arsenal manager Arsene Wenger-a'n a sang pali zinga tel turin kawng a la inhawn thu a sawi, a zawna season 20 chhung Champions League khel tur erawh chuan 'point hloh' a thiang tawh lo tih a sawi tel bawk.

Arsenal hian Crystal Palace an hneh loh hnuah Middlesbrough an hneh leh tawh a, FA Cup final lut turin Manchester City an hneh bawk; Leicester an hneh leh tak avangin match 32 aṭangin point 60 an hmu a, palina City an phak lohna chu point li a ni - khelh hmabak match ruk an la nei.

Arsenal manager Wenger chuan, "Ka nauten kan thil tum an hrechiang, club dang inkhel ngaihven hman kan ni lo a, inkhelh hmabak kan la neihah chiah rilru kan pe tur a ni," tiin a sawi. Wenger chuan Foxes team thawhhona ṭha a fak a, hnehna an chan chhan chu an dawhtheih vang a nih thu a sawi tel bawk.

Gunners hian Pathianni zan dar 9:00-ah North London derby khel turin Tottenham an lenchilh leh nghal dawn. Wenger-a naute hi an chak lo a nih chuan an hmelma leh elpui Spurs hnuaiah kum 1994-95 hnua a vawi khat nan season an khar dawn tihna a ni. League table-a pahnihna Tottenham hneh tur chuan goal hmaah tun aia an hriam zawk a ṭul ngei ang.

Foxes=Vanduai

Craig Shakespeare-a'n a kaihhruai chinah Foxes hian match hnuhnung pasarihah goal an khung vek a, tun ṭumah erawh goal an khung lo. Season hmasa a league nomawi chawipuitu striker Vardy-a'n an manager thar hnuaiah match 11 aṭangin goal sarih a khung tawh a, England international hi sum tam tham taka a mah sawmtu club lakah erawh a hriam tawk lo.

Leicester manager Shake­speare chuan, "Tlarhnung kan rem phui ṭha a, na tawka min nawrna pawh kan dangchat thei. Goal kan khung loh chhan pawh kan vanduai vang mai a ni. Inkhel inhnehtawk takah point kan hmu lo hi a pawi, tunah hian season thar atan kan la him tawk lo a, a tam thei ang ber point hmuh belh kan tum ang," a ti.

Sunderland an ral?

David Moyes-a enkawl Sunderland-in league match 33 an khelh aṭangin point 21 bak an hlawh chhuak thei lo a, table pawngphah luahlumtu an ni zel - a him china awm Hull City nen an inkarah point 12 zet a awm tawh. Black Cats hian relegation zone-ah ni 236 chhung zet hun an hmang tawh a, tun hnaiah point hmuh theih 27 aṭangin point hnih chiah an hmu thei.

Table mawng ber dawta awm Boro hian Marten de Roon goal hmangin tun season-a chak ni hmel an hmuh vawi ngana an tawng. Mahse, an dinhmun a khirhkhan zel dawn - Manchester City, Chelsea, Southampton leh Liverpool te an hmachhawn dawn avangin in hamtang tur chuan thilmak an thlen tir a ngai ang.