Hnehna nen Sharapova a lo kir
World number 1 hlui Maria Sharapova chu thla 15 chhung a inkhelh theih loh hnuah Nilaini zan khan court-ah a rawn kir leh ta. Russian nula hian Stuttgart Open first round-ah Roberta Vinci chu 7-5, 6-3 in a hneh nghal.
Nikum Australian Open hnua a match hmasa berah Sharapova hian a service hmasa ber a hloh nghal. Mahse, Italian star lakah insiamṭha nghalin a service ṭum hnih a chhuhsak thei a; a vanglai ang bawkin a ball vuak nat a chhawr ṭangkai zui leh - Aces vawi 11 a siam bakah winners ṭum 39 a nei.
Kum 30-a upa Sharapova chuan, "Hun rei tak ka nghak a, tunah chuan a takin a thleng dik leh ta. Ka chawlh chhung khan racquet khawih loh chang ka ngah a, inkhelhna tur court ka luh dawn chiaha ka hlimna san zia kha sawi chhuah phak a ni kher lo ang," tiin a sawi.
Grand Slam vawi nga champion tawh Sharapova hi Stuttgart bakah Madrid leh Rome Open chuan wildcard an pe fel tawh. Hmeichhe player dangten wildcard an pek dan hi an sawisel nasa a, Vinci ngei pawh hian an inkhelh hmain na takin a sawisel.
Sharapova chuan, "Mi ten engtianga khingpui hautak nge ka nih an hriat avangin sawiselna ka tawk, kei chuan ṭawngkam ni loin khelmualah a chhanna ka pe ang," a ti.
May 28 aṭangin French Open khelh tur a ni dawn a, inelna buatsaihtu lam chuan May 16 khian Sharapova hi wildcard an pek dawn leh dawn loh an sawi chiang ang. Ranking nei loa rawn kir hlim Sharpova hian wildcard a hmu lo a nih chuan French Open qualifying khel phak turin Stuttgart Open-ah hian final a luh a ngai.