Russia 2018-ah video referee

Football khawvela thuneitu sang ber FIFA president Gianni Infantino chuan 2018 World Cup Russia-ah video referee an hman tur thu a tichiang. Video assistant referee (VAR) technology hian goal, red card, player hmuh sual leh penalty chungchangah nasa takin referee a pui thei dawn a ni.

Infantino chuan, "World Cup-a VAR hman kan tih chhan hi engdang vang a ni lo a, he khawl hman a nihna hmun apiangah a ṭhatna leh ṭangkaizia thu hlir kan hriat let vang a ni," a ti.

FIFA hian December 2016-a Club World Cup khelh a nih ṭum khan video referee hi a lo hmang ṭan tawh a, thla hmasa lawka Spain-in Frence an hnehna friendly match-ah pawh hman niin referee thutlukna dik lo pahnih chu VAR hmang hian siam ṭhat a ni.

Khawvel hmun hrang hranga league ṭhenkhatah chuan video referee hi hman ṭan tawh niin Australia-a league sang ber A-League chuan tun thla tir khan a hmang ṭan a, top tier league zinga hmang hmasa ber an ni. Football Association chuan VAR hi January 2018 aṭangin hman ṭan tum angin insawi mah se EFL Cup first round aṭanga an hman leh zawk a rinawm.