PSG-in Monaco an sawp
Paris St-Germain chuan a zawna season thum chhung nomawi pathum chawi thei turin kawng dik an zawh zel. Nilaini zan French Cup semifinal inkhelah PSG hian AS Monaco 5-0 a sawpin final an lut.
Semifinal hmasa zawkah Ligue 1 table-a 14-na Angers chuan Guingamp chu si hnih faia hnehin kum 60 hnua a vawi khat nan final an lut ve bawk. May 27 khian Stade de France-ah final khelh a ni ang.
Paris-a inkhelah PSG tan hian Julian Draxler-a goal hmahruai khung chu Edinson Cavani, Angel Di Maria, Blaise Matuidi, Marquinhos ten goal khat ṭheuhin an belh a, Monaco defender Safwan Mbae chuan an mahni lamah a ti lut bawk.
Laurent Blanc bana Unai Emery lalauttu PSG hi an duh ber Champions League aṭangin tla tawh mah se league leh French Cup champion thei dinhmunah an la ding. April thla tir khan Monaco 4-1 a hneh in League Cup nomawi an chawi tawh bawk.
Monaco manager Leonardo Jardim-a'n Ligue 1 an ngaihpawimawh avangin player ṭha a chawlhtir tur thu a sawi lawk a, PSG lakah hian striker Radamel Falcao leh rawlthar duhawm Kylian Mbappe te chu squad-ah pawh an hming a lang lo, attacking midfielder Bernardo Silva chu bench lamah ṭhut chawlhtir a ni bawk.
Kum 2000 hnua league nomawi chawi tum Monaco hian match 33 aṭanga point 80 hmuin hmahruaitu an ni mek a, pahnihihna PSG nen an point a inzat - Emery naute hian match khatin an khel tam zawk thung.
Monaco hian Inrinni zan 8:30-ah Toulouse an hmachhawn ang a, karleh Nilaini zanah Champions League semifinal first leg khel turin Juventus an mikhual zui bawk ang.