Barca leh Real-in goal an sur tir La Liga nomawi inchuh boruak a sang

Spanish La Liga-ah hma­hruaitu Barcelona leh an hnuaia awm Real Madrid-in nomawi chawi ngei an tum tih an pholang zel - Nilaini zan khan Barcelona chuan an mikhual Osasuna chu dimdawina tel hauh loin 7-1 in an sawp a, Deportivo la Coruna khelmualah 6-2 in Real Madrid-in hnehna an chang ve bawk.

Javier Mascherano chuan Barcelona tan kum sarih zet a khelh hnua a vawi khat nan goal a khung a, Catalan club tana a goal hmasa ber hmu tur hian match 319 zet a nghak - a goal hi penalty aṭanga a khung a ni! Real tan hliam vanga Gareth Bale a inlan loh bakah Cristiano Ronaldo chu chawlh hahdamtir ni mah se Zinedine Zidane-a nauten harsatna an tawh phah lo.

Messi bawk!

Santiago Bernabeu-a Real players manto rual talbuai tirtu Lionel Messi-a'n Nou Camp-ah pawh a thiam thil bawk a 'show' a, table mawngphah Osasuna an relegate theih nan goal hnih ngawt a khung! Argentine forward hian minute 12-naah goal hmahruai a khung phawt a, Andre Gomes-a'n goal hnih dang a khung hnu minute 61-naah goal khatin an chhunzawm ve leh bawk.

Barca-a beisei a phak loh avanga sawisel hlawh tak Paco Alcacer-a'n Neymar hrem leh Luis Suarez chawlh hahdam chhawr ṭangkaiin goal hnih a khung ve bawk a, Barca chet

ṭhat a kaltluang hle! Osasuna tan Roberto Torres chuan minute 48-naah goal khat khung ve zawk mah se awmzia a nei thui lo a, Barca chhaih kawlhna goal satliah mai a ni.

Mascherano goal

El Jefecito (The Little Chief) tia hminglem an pek Mascherano-a'n Barca tana a goal hmasa ber a khung a, Nou Camp-a thawm chu ṭha tak a ni! Barcelona-in goal nga an khung tawh hnuah penalty an hmu a, players leh fan-ten Argentine midfielder hi pet turin an nawr - Liverpool midfielder hlui hi a lo pen chhuak a, Catalan club tana a goal hmasa ber a khung.

Kum 32-a upa midfielder chuan, "A tirah kha chuan pet tumna ka nei lo a, mah se fan-te leh ka ṭhianten min nawr nasat em avangin ka pen chhuak ta a ni," a ti a, Barca boss Luis Enrique pawhin, "Goal hnung lama fan-te khan Mascherano kha pet tura an duh avangin a hming lamin an au rual a, he club tana player pawimawh tak a nih avangin ka lawmpui a ni," a ti.

Goal khung thiam

Real Madrid-in an chhuan­vawr Cristiano Ronaldo tel lo pawhin harsatna an tawk lo tih an pholang a, Deportivo khelmuala goal khung tura an hun mamawh zat chu second 54 a ni - Alvaro Morata chuan he inkhela goal hmasa ber hi a khung a, James Rodriguez chuan a class sanzia pholan pahin an goal hnihna a chhunzawm ve bawk.

Zidane-a nauten goal hnih an khung hnuah Deportivo tan Florin Andone-a'n goal khat sut ṭhen mah se Real-in Rodriguez goal hnihna, Lucas Vazquez, Isco leh Casemiro te goal khung hmangin Deportivo tlarhnung an run chhunzawm a, mualneitu tana goal hnihna Joselu-a'n minute 84-naa a khung meuh chuan awmzia a nei tawh lo.

Zidane thukhawchang

Real boss Zidane chuan, "Hlim takin he khelmual hi ka chhuahsan dawn a ni. Ka player zingah he hmuna khelhna chang tam lote pawhin an theihna an pholang a, an hun ṭha neih an chhawr ṭangkai hle. Squad ṭha tak ka kawl a, an hmaa chona inchhawp apiang hmachhawn turin an inpeih a ni," tiin a hlim hle.

Deportivo laka khel ṭha zet Isco chu fan-ten standing ovation an pe a, Zidane chuan, "Khingpui fan-ten chawi­mawina min pek hi chu thil thleng zen zen lo a ni a, a khelh ṭhat em avang erawh chuan a phu a ni," tiin a player a fak.