June-ah Indian football awards sem dawn

April 30-ah I League khelh zawh a ni tawh dawn a, All India Football Federation chuan he inelnaa che ṭhate chawimawina tur Indian football awards chu June 8 khian Mumbai khawpuiah a sem dawn.

AIFF chuan league-a che ṭhate bakah Indian player ṭha ber a thleng dawn bawk a, heng bakah hian special awards pathum sem chhuah a ni ang. FIFA huaihawt tournament-a Indian referee inlan hmasa ber Uvena Fernandes chu chawimawina pek a ni dawn a, Goan referee hi FIFA Under 17 Women's World Cup nikuma khelhah khan referee zingah a tel phak a ni.

Uvena bakah hian Norwegian club ṭha Stabaek tana si ban nghaktu Gurpreet Singh Sandhu chu Indian player zinga Europa League khel hmasa ber a nih avangin chawimawina pek a ni dawn bawk a, Indian club zinga AFC Cup final lut hmasa ber Bengaluru FC chu chawimawi an ni bawk ang.