Zafar Ansari a chawl

England all-rounder Zafar Ansari chuan kum 25 leka upa nichungin cricket a chawlhsan thu a puang a, tum dang hlen ngei tur a neih avanga cricket chu mangṭha a nih thu a sawi nghal bawk.

Ansari hian October khan England tan test match hmasa ber Bangladesh lakah a khel ve chauh a, India lakah test match hnih a khel bawk. First class cricket-ah match 71 khelin wicket 128 a la a ni.

County Champion­ship-a Surrey tana khel spin bowler chuan, "Professional cricket-a kum sarih hun ka hman hnuah cricket chu ka mangṭha dawn ta. Cricket ka chawlhsan hun hi mi tam tak tan chuan a mak mai thei a, mah se cricket hi ka nuna thil thleng pakhat ve chauh a ni tih hi ka ngaihdan a ni," a ti.

Ansari chuan sawi chhunzawmin, "Tunah chuan career dangah rilru ka seng tawh dawn a, law (dan zirna) lamah ka kal ka inring a ni," tiin a sawi. Ansari hi Cambridge University aṭangin politics, philosophy leh sociology-ah a graduate a, University of London aṭangin history-ah master degree a nei bawk.