ISL 3 leh I League 3 awmna Durtlang an tla

Player neih ṭhat dan ena champion tura rinkai Durtlang an tla - Thenzawl West an hneh lo!

LBS Suzuki All Mizoram Inter Village Football Tournament 2022-ah thilmak a thleng - Indian Super League leh I League player pathum ve ve awmna Durtlang chuan nimin khan MZU Ground-ah Thenzawl West an hneh lo.

Durtlang hi Jeje Lalpekhlua enkawl an ni a, ISL-a khel Ricky Lallawmawma, Hmingthanmawia (Valpuia) leh Isaac Vanmalsawma an kawl. I League player Lalliansanga (Notea), Lalchungnunga leh Lalfelkima-te bakah Chennaiyin FC reserve player hlui Lalmuanzova leh MPL-a tawnhriat nei Jessy Vanlalmuana-te kawl mah se team 128 zingah an tel pha lo.

Thilmak chu
Durtlang an ṭha a, player ṭha an neih bakah khelmual ṭha an neih avangin champion tura rinkai an ni hi thilmak a ni lo. Thenzawl West erawh hming langsar an awm lo a, inkhelh zawhah pawh an player-ten Durtlang player thla an lakpui sup sup!

Durtlangin minute khatna lekah Jessy hmangin goal an khung a, Thenzawl West-in Lalhmingliana Kawlni hmangin minute 27-naah an sut. Second half-ah pawh Durtlangin Jessy hmang bawkin minute 51-naah hma an hruai nawn.

Thenzawl West an tlawm duh lo a, ISL leh I League player tamna Durtlang an hlau bik lo. Chak tumin goal an sual a, Durtlang keeper ṭhat tawk lohna chu remchanga lak tumin goal-ah an pet hnem. Injury time-ah Lallawmkima hmangin si phurh an sut zo.

Penalty shootout-ah Thenzawl West-in penalty hlah hmasa mah se Durtlang tan ISL player Valpuia leh I League player Felkima ten an pet over a, Thenzawl West 4-3 in an chak. Inkhel result hian tualchhung football ngainatute a barakhaih chiang hle.

Danmawia leh midang
R. Laldanmawia te khua Sialhawkin Tuikual North 5-1 in an hneh a, Tun season ISL-a Mizo zinga goal thun hnemk ber Danmawia hian goal hnih a khung - Sialhawk hi team ṭha an ni.

Hlimenin goal riat ngawt an khung a, Lengte 8-3 in an sawp. College Veng pawhin Thinghlun 4-1 in an hneh a, chiang takin chak mah se goal hnuhnung pathum hi hun tawp lam minute 15-a lut a ni.

Lengpuiah Melbukin Lamzawl 2-1 in an hneh a, Champhai champion an nih theih nana player pawimawh Lallawmsanga leh Lalsawmzela te bawk che ṭhain goal khat ve ve an khung. Melbuk hi Mizo coach lar Lalsangzuala Hmar enkawl an ni a, Lamzawl hi HC Zarzoliana enkawl a ni thung.

Champhai team dang Champhai Kananin 10-2 zetin Thenzawl East an sawp a, Thenzawl aṭanga team pahnih result a inang lo hle.

Aizawl team ṭha zingah Tuithiang telh an ni ngai lo a, amaherawhchu coach Lalremruata'n a enkawl avangin team tum châkawm lo ber zinga mi an ni. Nimin khan Tuithiang hian Biate 6-1 in an sawp.

Tuithiang ṭhenawm Saron Vengin Buangpui 6-0 in an sawp a, hetiang zat bawk hian Tlangnuam Vengtharin Hmawngbu an sawp. An chakna zat thlirin Saron leh Tlangnuam Vengthar hi dah hniam chi an ni lo.