Team huaisen Chawnpui vanduai

Mizo player hlanga Mizoram Super League kheltu Chawnpui chuan Khatla TBL lakah inkhel hmuhnawm an chhawp chhuak, a tawpah 106-104 in chak lo mah se tun season chhunga an khelh ṭhat leh hmuhnawm ber ṭum a ni hial ang.

TBL leh Chawnpui te an inkhel tawk hle a, quarter lina an khelh zawh thlengin chak zawk an awm lo. Overtime-ah pawh an inchai tawk viau, TBL lamin point 10 an neih belh laiin Chawnpuiin point riat an nei thung, an inthlauhna chu point hnih chauh a ni.

MSL vawi hnih champion tawh Khatla TBL hian table-ah pahnihna dinhmun an luah a, an league match hnuhnung ber atan Inrinni zanah Chanmari Vikings an hmachhawn ang. Chak lo Chawnpui erawhin beisei an nei tawh lo.

Thawhlehni zan R. Dengṭhuama Stadium, Mualpuia inkhel dangah Chanmari Vikings an mualpho. Vikings hi Tuikual South lakah 74-53 in an chak lo. Tun season MSL bikah match khata point nei tlem ber record an siam hial a ni.

Vikings hian zaninah Mission Veng Hotshots an hmachhawn leh nghal dawn, an intawn hmasaka an hneh loh an nih avangin ṭan a ngai khawp ang. Chumi hnuah TBL an la hmabak leh bawk, match pahnihah an chak a nih chuan Play In an la khel phak thei.