Minamino-a'n Liverpool a chhuahsan ta
Japanese forward Takumi Minamino chuan Liverpool chhuahsanin AS Monaco a zawm ta a, Ligue 1 club hian Minamino manah pound maktaduai 15.5 an seng a, kum li chhung atan contract an ziahpui.
Minamino hi Leeds United, Wolverhampton Wanderers, Fulham, Southampton leh AS Monaco ten lakluh an duh vek a, a tawpah French club zawm a thlang ta.
January 2020-a £7.25mtd-a Liverpool zawmtu Minamino chuan, "Hmachhawp ropui tak nei team ka zawm thei hi ka lawm a, club kalphung nghet nei leh Ligue 1-a langsar ber pawl AS Monaco zawm hi ka tan chuan a lawmawm a, thil thar tawn a, ka club tana ka theihna zawng zawng hlan ka chak tawh takzet a ni," a ti.
Minamino hian Liverpool a pan hnuah Premier League nomawi vawi khat a chawi a, season hman zawh taka FA Cup leh League Cup-a Liverpool champion theih nan a thawhhlawk hle bawk.
Japanese forward hi FA Cup-ah goal thum khungin Reds tan top scorer a ni a, League Cup lamah pawh Taki hian goal li khungin Reds player zingah ani aia khung hnem an awm lo a, assist vawi khat a nei bawk - season hman zawh takah khan inelna hrang hrangah match 22 khelin goal 10 a khung.
Mahse, Premier League-ah match 11 chiah khelin heng zinga match khatah chiah hian bul a ṭan - Monaco hian a man atan hian £12.9mtd an pe phawt ang a, a khelh ṭhat dan a zirin £2.6mtd an pek belh ang.
Liverpool boss Jurgen Klopp chuan, "A khelh dan leh a goal khungte avangin Liverpool 'Champions Wall' pawh thlak danglam a ngaih phah fo a, he hmuna a hnathawh hi hriatreng a ni tawh ang," a ti.
German coach chuan sawi zawmin, "Taki kaltir mai hi a harsa hle. Mahse, club thar zawm hi a phu a, a tan a ṭha bawk a ni. Player professional tak, talent nei ṭha tak, a bula awm nuam em em, midang phurna pe theitu, manager-te tana enkawl châkawm tak player a ni," a ti a, Taki a fak hle.
Red Bull Salzburg forward hlui Taki hian Liverpool a cham chhungin inelna hrang hrangah match 55 khelin goal 14 a khung a, assist vawi thum a nei. Southampton-ah loan-a kaltir a ni bawk a, match 10-ah goal hnih a khung.