Nadal a dam tih a takin a lang

Rafael Nadal-a ke na a dam tawh. Wimbledon khelh hma khan "Ka dam, inkhel turin ka inpeih," tiin a sawi, a sawi ang ngeiin Spanish star hi a kephah hliam vangin a buai ta lo - a tuartu chu Francisco Cerundolo a ni.

Thawhlehni zan Centre Court-a inkhelah Nadal hian, darkar thum leh a chanve chhungin Cerundolo hi 6-4, 6-3, 3-6, 6-4 in a hneh. Straight set-in chak chiah lo mah se, set hnuhung berah hian dinhmun ṭha lo deuha a din hnuah Nadal hi a dingchang.

Grand Slam vawi 22 champion tawh Nadal chuan, "Tun ṭumah chuan ka ke na chungchang sawi a ngai lo, hei hi chanchin lawmawm a ni. A pawimawh ber chu tennis zawk hi a ni a, hliam vanga buaina ni loa tennis kan sawi thei hi ka lawm.

"Francisco khan a khel ṭha, a tir lamah phei kha chuan a harsa hle. Kum thum hnua Wimbledon ka khelh lehna a nih avangin thil engkim mai hi a thar ang mai a ni a, he hmuna ka lo kir leh thei pawh hi thil lawmawm a ni," a ti.

French Open an khelh lai kha chuan, match a khelh dawn apiangin Nadal hi a ke phah hliam vangin chiu (jection) a ngai ṭhin. Roland Garros hnuah a hliam enkawl dan a thlak a, chu chuan rah ṭha a chhuah mek zel.

Mipa player langsar zingah Felix Auger-Aliassime chu a match hmasa berah a chak lo, seeded parukna hi world number 45 Maxime Cressy lakah 7-6 (7-5), 4-6, 7-6 (11-9), 7-6 (7-5) in a tlawm nghal.

Season hmasa finalist, kumina grass court season hmang ṭha bawk Matteo Berrettini chu hripui a kai avangin a inhnukdawk. Ani hma hian Marin Cilic pawhin hri leng hi a lo kai tawh. Stefanos Tsitsipas, Denis Shapovalov, Alex de Minaur, Reilly Opelka te erawh an chak thung.