Hneh nei loin Serena a tla!

Serena Williams beiseina chu a match hmasa berah a thamral nghal. American star hian hnehna chan tumin Centre Court a pan a, mahse a chhungah Harmony Tan a lo awm si. Fans lamin ṭan viau mah se 7-5, 1-6, 7-6 (10-7) in a chak lo.

Ni 364 a liam hnuah All England Club-ah a inlan ve leh chauh a ni a, kar hmasa lam khan doubles match khel thei mah se singles a la khel lo. Tunah erawh singles a khel, darkar thum leh minute 14 an inkhelh hnuah a vanduai zawkah a ṭang.

Wimbledon vawi sarih champion tawh Serena hnehtu Tan-i chuan, "Serena nen kan inkhel dawn tih ka hriat khan ka huphurh hle. A chhan chu player ṭha bik, danglam leh legend a ni. Ka tan chuan Wimbledon meuha ani hneh chu a ropui ngei mai," tiin a sawi.

Grand Slam vawi 23 champion tawh Serena hi Wimbledon a khelh hnuhnung zawkah pawh a chak lo, a match hmasa berah Aliaksandra Sasnovich nen an inkhelh laiin a hliam, a chawlh vang vang hnuah rawn kir leh mah se a chak lo leh nghal.

Tunah chuan Serena hi kum 40 mi a ni tawh, a vanglai a pel chho ta. Major title la hnem ber thei tura ngaih kha a ni ṭhin, amaherawhchu vawi 24 champion tawh Margaret Court-i a tluk thei dawn ta lo niin a lang, world number 1204 tan hian beiseina erawh a la awm.

Thawhlehni zan inkhel dangah Iga Swiatek a chak. World number 1 hian Jana Fett chu 6-0, 6-3 in a sawp a, tun hnaia match a khelh hnuhnung 36 zetah hnehna a chang vek. Kum 2011 hnu lamah chuan hmeichhe player chak zawn rei ber a ni hial.

Thawhlehni khan player ṭha dang Simona Halep, Petra Kvitova, Paula Badosa, Maria Sakkari, Coco Gauff leh Jelena Ostapenko te pawhin an khingpui ṭheuh hnehin second round an inhlangkai ve bawk a ni.