Khaw hla ber Hmawngbu

All Mizoram Inter Village Football Tournament-ah team 204 an tel a, Aizawl aṭanga teha khaw hla ber chu Hmawngbu niin Lawngtlai District-ah an awm. Kum 2011 chhiarpui aṭanga a lan dan chuan Hmawngbuah hian in 180 awmin mi 895 an awm.

Nimin inkhelah hian Hmawngbu hian MFA Ground, Sairang Dintharah Tlangnuam Vengthar an hmachhawn a, 6-0 in an chak lo. Aizawl aṭanga tehin Hmawngbu hi 392.2 km a ni a, football tana an inpekna hi a hlu hle.

Tun ṭum inelnaah hian Aizawl aṭanga teha 300 km chuanga awm khaw panga zet an awm a, chungte chu Lawngtlai Dist aṭanga rawn tel Hmawngbu, Mautlang South, Tuithumhnar leh Bungtlang South te bakah Siaha Dist aṭanga tel Siaha Vaihpi te an ni.

Mizorama district 11 aṭangin team an tel kim vek. Aizawl District aṭangin team 103 an tel a, heng zinga 71 hi AMC area-a awm an ni. Mamit District aṭangin team 26 an tel a, Aizawl tiam loin team an thawh hnem ber.

District dang aṭanga team tel dan chu Kolasib (19), Serchhip (15), Saitual (13), Champhai (8), Khawzawl (8), Lawngtlai (6), Hnahthial (3), Lunglei (2) leh Siaha (1) te an ni.