Milan-a medical nei tur Origi

Liverpool-in a contract zawh ruala an chhuahtir tak, forward Divock Origi chuan AC Milan-ah medical a nei dawn a, he thuziak i chhiar meuh chuan Italian champion hi a zawm tawh hial mai thei.

Kum 27 mi striker hian season hman zawh takah khan Reds tan inelna hrang hrangah match 18 khelin goal ruk a khung a, assist vawi li a nei.

July 2014 khan Origi hian Liverpool hi Lille aṭangin a zawm a, hetihlaia a man zat hi pound maktaduai 10 niin, kum nga atan conrtract a ziak a, Lille-ah hian loan-in season khat dang a khel zui.

Merseyside club-a a kir hnuah season sarih chhung a khel a, match 176-ah goal 41 khungsakin assist vawi 18 a nei a, Premier League, FA Cup, League Cup, Champions League, UEFA Super Cup leh FIFA Club World Cup-ah te a champion vek.

Reds tan a goal khung hi tam tawk lo angin lang mah se, goal pawimawh bik a khung theih em avangin Liverpool fan-te ngainat rawn a hlawh a, Champions League 2019 an champion theih nana a thawhhlawkzia te kha theihnghilh theih a ni lo.

Champions League semifinal-a Barcelona laka comeback ropui an lantirna inkhelah goal li a khung a, final-a Tottenham Hotspur 2-0 a an hnehna inkhelah goal khat a khung bawk.