Mumbai tan Lianzuala a khelh chhunzawm dawn

Mizo footballer langsar ber pawl Lallianzuala Chhangte chuan Mumbai City-ah kum thum chhung khel turin contract thar a ziak a, thla ruk loan-a a khelh hnuin a nghetin a zawm ta tihna a ni.

Lianzuala hian season hmasa khan Chennaiyin FC-ah bul a la ṭan a, mahse, season chawhnu lamah Mumbai hi loan-in a pan - Mumbai club nen hian a loan hun a zawha contract nghet ziak turin an inrem sa.

Chennaiyin hian an player ṭha hi a thlawnin an kaltir ngawt bik lo. Mumbai hian loan-a an hawh dawn hian nuai 120 an inseng a, an sum sen zahve hi player hlawh atan kal tel tir a ni.

Lianzuala chuan, "Mumbai City hi Indian club zinga hmabak nei êng ber pawl an ni a, a bik takin tun hnai kum thum chhung hian hma an la nasa hle. City Football Group rawn lan hnuah phei chuan hmasawn tumin an bei nasa a, zawm hun tak niin ka hria.

"Keima mimal tan pawh, ka hmasawnna tur atana team ṭha an ni a, chumi piahlamah chuan nomawi chawi theihna chance a sangah ka ngai a, champion tumin he hmun hi ka pan a ni," tiin Vanglaini a hrilh.

Lianzuala hian ISL-ah match 97 khelin goal 20 a khung a, assist vawi ruk a nei - Indian player zingah ISL-a goal khung tam pathumna a ni mek a, match 76-a goal 24 khungtu, Mizo legend Jeje Lalpekhlua leh match 114-a goal 51 khung thei Sunil Chhetri chiah a tluk lo.

DSK Shivajians, NorthEast United leh Delhi Dynamos tan pawha lo khel tawh Lianzuala chuan, "Mizo mipuite min lo ṭawngṭaipui zel turin ka sawm a, keimah chauh ni lo, Mizo footballer-te hian an ṭawngṭaipuina kan mamawh reng a ni - Mumbai City fans pawh lo pung hluai rawh se," tiin Vanglaini a hrilh.

Mumbai City hian July thla tawp lamah pre-season training an nei ṭan dawn a, Lunglei tlangval Lianzuala pawh July 22 velah Mumbai City squad a zawm ang.