Mizoramin I League champion kan nei dawn? Pathiannni zanah Aizawl FC Vs Shillong Lajong
Aizawl FC leh Mizo club ṭantuten NorthEast-a I League match hmasa ber khelhna Shillong an pan a, an beisei chu I League nomawi a ni.
Pathianni zan dar 7:05 hian Aizawl FC leh Shillong Lajong ten tun season I League match hnuhnung ber an khel ang a, Mizo club tan champion turin point khat a tawk.
Bagan beiseina
Mohun Bagan-in kum 2015 khan a vawi khat nan I League nomawi an chawi a, anni hi kumina Mizo club baka champion beiseina la nei awm chhun an ni.
Mariners hian an mualah Chennai City an mikhual dawn a, NorthEast derby khelh rual chiahin an khel ve ang. Jeje Lalpekhlua khelhna club tan nomawi chawi turin Aizawl FC chak loh a ngaih bakah point thum an hlawhchhuah a ṭul bawk.
NorthEast derby chu
Aizawl FC-in RG Stadium-a Lajong an mikhual hmasak ber ṭumin goal a lut lo. NorthEast Derby Shillong-a khelh ṭumah mualneitu 3-1 in an chak.
Tun season-ah erawh Aizawl FC an chungnung. Khalid Jamil-a kaihhruaina hnuaiah Mizo club-in Lajong 2-1 in an hneh. Tun season ṭan tirha neih I Day Football-ah AFC-in semifinal-ah Lajong hnehin nomawi an chawi a, derby-a Mizo club record a ṭha tawh zawk tihna a ni.
Captain aiah captain
Khalid Jamil-a hnuaia la khel tluan vek chu keeper Albino Gomes, defender Zohmingliana Ralte leh captain Alfred Kemah Jaryan te an ni. Inkhel pawimawhah AFC player pawimawh Alfred chu hrem vangin a khel dawn lo a, captain aiah hian Mizoram Police captain V. Lalṭanpuia chu inkhel bul ṭan tura ngaih a ni.
Police midfielder Ṭ-a hian Mahmoud Al Amna inhliam laiin vawi hnih inkhel bul a ṭan tawh a, substitute aṭangin vawi riat a tlan lut tawh. Mizo midfielder huaisen ber zinga mi hian a nau Jacob Lalrawngbawla khelhna Lajong a hmachhawn hmel.
Hrem vang thoin Ashutosh Mehta a inlan thei dawn lo a, Mizo defender ṭha Lalruatthara tan hun duhawm a inherchhuakah a ngaih theih thung.
Hlauh tur a awm lo?
Shillong Lajong-in an mual an hmang thiam a, chutihrualin Aizawl FC anga mahni muala record ṭha bik nei an ni ve lo. Thangboi Singto hote hian an mualah DSK Shivajians, East Bengal leh Bengaluru FC te an hneh lo a, Mohun Bagan nen an inhnehtawk bawk.
Mizo club tan JN Stadium hi point hmuh theihna tur hmun a ni a, amaherawhchu Lajong hi pressure hranpa nei loa khel tur an nih avangin fimkhur erawh a ṭul ang.
Lajong-in Mizo club an hmachhawn hunah meuh chuan inkhel result-in nghawng a neih a rinawm loh. Amaherawhchu NorthEast-a I League club hmasa ber tan Mizo club champion hi mualphona a nih theih avangin theihtawp la chhuah chhan tur erawh an nei ṭha hle.
Shillong-ah Red Army
Mizo club ṭawiawm turin Mizo ṭhahnem takin Shillong pan an tum a, Meghalaya khawpuia awm sa Mizo 2000 bawr velin inkhel en an tum.
Aizawl FC coach Khalid Jamil chuan, "Inkhel pawimawh bik a ni a, kawng hrang hrangah theihtawp kan chhuah vek a ṭul a ni. Aizawl FC tan Mizoram pum ṭawngṭai ila, kan ban phaka awm nomawi chawi tur hian kan theihna zawng zawng kan chhuah vek a ngai a ni," tiin Vanglaini palai a hrilh.
Hmelhriat inkhel tur
Lajong squad pumpuiah Mizo paruk an awm a, Aizawl FC player hlui Yuta Kinowaki a awm bawk.
Aizawl FC lamah hian Lajong player hlui - Zotea, Lalmuankima, Lalrinzuala, Lalawmpuia leh Albert Zohmingmawia-te an awm bawk a; Aizawl FC midfielder Ṭ-a leh Lajong midfielder Jacob-te hi unau an ni.
Fixtures
Zanin Inkhel Tur
7:05 PM Mumbai FC Vs East Bengal
7:05 PM Bengaluru FC Vs Churchill Brothers
April 30, Pathianni
4:35 PM DSK Shivajians Vs Minerva Punjab
7:05 PM Mohun Bagan Vs Chennai City
7:05 PM Shillong Lajong Vs Aizawl FC