Zaninah MSL All Star

Basketball ngainatuten hmuh­nawm an tih All Star game, Slam Dunk leh 3-Points inelna te chu Hawla Indoor Stadium-ah a en theih dawn a, inkhel en man hi Rs 100 leh Rs 200 chauh a ni.

Tualchhung basketball-a hun bik hi zanin dar 7:30-ah ṭan a ni dawn a, MBBA lam chuan zanin hun hman dan tur hi hlimawm leh hmuhnawm turin an duang a, hmaih phal chi a ni lo.

Nizan khan MSL3 league round khelh zawh a ni a, team tinin match nga ṭheuh an khelh hnua tualchhung player mal khaia che ṭha Zonunsanga, Lalhmachhuana leh Lalrohlua ten 3 points shoot out inelna an hmachhawn dawn.

Slam dunk nei turin hming pali chhawpchhuah zingah Matthew Remtluanga Sailo chiah tualchhung player a awm. BCA star Pupu-a bakah hian foreigner pathum Chris Solomon, Ronald March leh Daniel te hming a lang bawk.

All Star a inlan tur hian Misson Veng Vikings leh Zarkawt Serpents te chuan player pali an thawh a, player nei hnem an ni. Team dang BCA, Hollow, TBL leh Tuikual South ten player pathum ṭheuh an thawh bawk a ni.