Champion tum Real leh Barca hna a hautak
Spanish La Liga-ah Real Madrid leh Barcelona point hmuh zat a inang a, match khatin Real an khel tlem thung. Champion nomawi chawi tum club pahnih hi zaninah an inlan ve ve dawn a, club pahnih tan awlsam taka point thum hmuh theih a ni dawn lo.
Real Madrid-in zan dar 7:45-ah tun season-a an ngam loh tawh Valencia an mikhual dawn a, Barcelona-in Catalan club derby khel turin Espanyol chu zan dar 12:15-ah an lenchilh ve leh thung ang.
Buai ngai lo Real
Real Madrid-in El Clasico-a Barcelona an ngam loh hnu lawkah league match an khel lehnghal a, La Liga nomawi inum boruak a san vanglai takin coach Zinedine Zidane-a'n thutlukna huaisen siamin Deportivo La Coruna lakah a players ṭha rual a chawlh hahdamtir a, harsatna nei loin goal ruk an khung tho!
May 2 zanah Real-in Champions League semifinal first leg an khelh lehnghal dawn avangin zaninah Zidane-a'n engtiang takin nge players a remkhawm dawn a hriat loh a, February 22-a an inhmachhawn hmasaka 2-1 a an tlawm avang erawh chuan a fimkhur khawp ang.
Bale tel lohna
Real Madrid forward Gareth Bale chu a chawnah hliam a tawrh avangin season tawp nomawi inchuh boruak san lai takin Real tan a inlan thei dawn lo a, Barcelona laka minute 39-naa lakchhuah ngai Bale awm dawn lo mah se James Rodriguez an neih avangin an buai phah lutuk lo ang.
Zidane-a naute tan hrem vanga Deportivo laka inlan thei lo Sergio Ramos a inlan leh theih tawh a beiseiawm a, Raphael Varane a dam tawh bawk. Valencia-in khualmuala an match hnuhnung 13-ah vawi hnih chiah chak hmel hmu mah se Real hi an hneh tawh hnu an nih miau avangin 'hneh theih an ni' tih rilru pu chungin Santiago Bernabeu an pan ang a, an match hnuhnung 15-a vawi khat chiah goal chhuah loh nei Real hi an zuam sawt ang.
Catalan Derby
Real Madrid-in an hmabak match ngaah hnehna an chang vek a nih chuan nomawi an chawi dawn a, Barca tan chuan Real vawi khat tawlthluk chana an hmabak match lia hnehna chan vek bawk a ṭul tihna a ni - zanin Catalan derby an khelh hunah tawlthluk a thiang dawn lo.
Barcelona-in Champions League quarterfinal aṭanga petchhuah an nih hnuah an thiam ngai an la thiam reng tih erawh an pholang a, an elpui Real hneha league nomawi beiseina chhi nung tharin Osasuna chu 7-1 ngawtin an sawp bawk. Espanyol lakah ṭhat chhuah an tum lo tawp ang.
Messi Ropuia
Lionel Messi ropuina sawi nep tum ni ṭhin mah se Argentine forward hi sawi nep hleihtheih a ni lo. Juventus laka hmuh tur a awm loh hnuin Santiago Bernabeu-ah Real fan-te a ngawihtir tawh a, Osasuna lakah goal hnih a khung bawk - tun season La Liga-ah match 30 khelin goal 33 a khung tawh a, inelna hrang hrangah match 47 khelin goal 49 a khung bawk - Espanyol tlarhnung tan ven bik a sual lo ang.
Barcelona-in hrem vangin Neymar la chhawr thei dawn lo mah se Real leh Osasuna lakah Brazil captain an ngai lo tih an pholang tawh a, an buai phah lo ang. Barca tan Osasuna laka chawlh hahdamtir Luis Suarez a inlan leh tawh beisei a ni. Tun season inelna hrang hranga goal 32 khung tawh striker hi Barca nen vawi 56 an inhmachhawn tawha vawi ruk chiah la chak Espanyol tan mangchhia thlen theitu a ni.
Nizan Inkhel Results
Deportivo Alavés 0 - 0 Eibar
Sevilla 2 - 1 Celta de Vigo
Athletic Club 2 - 1 Real Betis
Zanin Inkhel Tur
Real Sociedad 4:30 PM Granada
Real Madrid 7:45 PM Valencia
Las Palmas 10:00 PM Atlético Madrid
Espanyol 12:15 AM Barcelona
April 30, Pathianni
Osasuna 3:30 PM Deportivo
Real Betis 7:45 PM Deportivo Alavés
Eibar 10:00 PM Leganés
Celta de Vigo 12:15 AM Athletic Club
May 1, ThawhTanni
Málaga 12:30 AM Sevilla