Sindhu a sang zel

Ningani zan khan Badminton Asia Championships 2017 khelh mekah PV Sindhu chuan Aya Ohori hnehin quarterfinal a in vaw kai.

Wuhan Sports Center Gymnasium-a inkhelah Sindhu hian minute 40 chhung lekin seeded pawh chang phak lo Ohori hi 21-14, 21-15 in a hneh. Sindhu hian a match hmasa zawkah Indonesian shuttler Dinar Dyah Ayustine chu a hneh tawh bawk.

India nula Sindhu hian kum 2014 khan Badminton Asia Championships-ah hian bronze medal a lo dawng tawh. Kuminah world number 1 hlui Saina Nehwal chu a match hmasa berah a tlak tawh avangin Indian nula zingah Sindhu chiah hi medal la thi dinhmuna ding a ni.

Mipa singles lamah Ajay Jayaram chu Chinese Taipei tlangval Hsu Jen Hao lakah 19-21, 10-21 in a tlawm. World ranking chhuak thar berah Jayaram hi number 13 a ni a, badminton a khelh hun chhunga a tawn san ber ṭum tawng mek mah se Jen Hao lakah chak ni hmel a hmu thei ta chuang lo.