Reds-ah Lovren tan contract thar

Liverpool defender Dejan Lovren chuan Reds tan kum 2021 thleng khelh chhunzawm turin contract thar a ziak. Kum 27-a upa defender hian kum 2014 khan Southampton aṭangin Reds hi pound maktaduai 20-in a zawm a, season tharah a contract zo dawn mah se Anfield-a cham zel thlangin contract thar a ziak ta a ni.

Croatia defender Lovren chuan, "Vawiinah hian khawvela pa hlim ber ka ni hial ang. Ka club hmangaiha kum tam zawk khelh hi ka suangtuah a ni fo ṭhin a, chu ka club hmangaih chu Liverpool hi a ni," tiin a sawi.

Lovren hian tun season-ah Reds tan match 28 khelin goal hnih a khung tawh a, Liverpool a pan tirhin beisei phak lo mah se manager Jurgen Klopp-a hnuaiah a theihna tak tak pholangin Reds player rinrawl zinga mi a ni.