India leh Benfica inhnehtawk

FIFA World Cup Under 17 khel tura inbuatsaih mek India Under 17 chuan Portuguese club ṭha Benfica Under 17 chu 2-2 in an inhnehtawkpui. Portuguese coach Luis Matos enkawlna hnuaiah Indian hian Portugal-ah training an nei mek a, May thla khian Italy-ah Lazio Cup an la khel leh dawn bawk.

Seixal Stadium, Portugal-a inkhelah hian Benfica-in inkhel thunun zawk mah se goal erawh hmuh tur a awm lawk lo a, minute 70 hnuah goal hmasa ber a lut chauh. Minute thum chhung lekin Benfica tan Sergio leh Gomes ten goal khung mah se counter attack-a innghat Indian rawlthar rual an beidawng duh lo a, Jitendra (79') leh Shahajahan (85') hmanga an si phurh sutin an inhnehtawk a ni.