Lions chak nan Aaron Finch

Gujarat Lions chuan Ningani zan khan Royal Challengers Bangalore chu wicket sarih ngawtin an hneh a, Lions tan run 72 siamtu Aaron Finch a langsar hle.

Bangalore khawpuia inkhelah mualneitu an bat hmasa zawk a, over 20-ah run 134 chiah siamin wicket 10 an hloh. Batting line-up nei ṭha RCB-in beisei an phak lo a, Chris Gayle (8), captain Virat Kholi (10) leh AB de Villiers (5) te hma taka an out hnuah run siam hnem ber Pawan Negi meuh pawhin run 32 bak a tlin thei bik lo!

Guajarat Lions tan bowler zingah Andrew Tye a che ṭha takzet a, over li a vawmah run 12 chiah pea wicket thum lain RCB batsman ten an ngam lo hle.

Mikhual team bat hun a thleng a, an target umpha tura an over mamawh zat chu 13.5 chiah niin wicket thum chiah an hloh! Lions tan opener Ishan Kishan (16) leh Brendon McCullum (3) te hma takah out mah se run 72 siamtu Aaron Finch bakah captain Suresh Raina (34) chuan a thiamna a pholang a, awlsam takin hnehna an chang.

Lions-in vawi riat khelhah point ruk hmuin hma an sawn ve hret a, RCB erawh vawi kua khel tawhin point nga bak an la nei thei lo.

Zanin Inkhel Tur
Rising Pune Supergiants 04:00 PM Royal Challengers Bangalore
Gujarat Lions 08:00 PM Mumbai Indians
Pathianni Zan, April 30
Kings XI Punjab 04:00 PM Delhi Daredevils
Sunrisers Hyderabad 08:00 PM Kolkata Knight Riders