Cavs hmachhawn tur Raptors

Toronto Raptors chuan NBA playoff first round paltlang turin nimin zing khan Milwaukee Bucks 92-89 in an hneh. Raptors hian series 4-2 in an la a, conference semifinal-ah Cleveland Cavaliers an hmachhawn ang.

BMO Harris Bradley Center-a inkhelah Raptors tan hian DeMar DeRozan chu player langsar niin point 32 a score a, point 13 neitu Kyle Lowry-a'n a thlawp ṭha hle bawk. Raptors hi regular season-ah khan Eastern Conference-ah pathumna an ni a, playoff semifinal an hmachhawn tur cavs hi pahnihna an ni thung.

Raptors coach Dwane Casey chuan, "Regular season-ah khan Cavs hi kan tluk lo a, playoff kan khelh chinah erawh hmasawnna kan neih ngah tawh avangin conference final lut turin inrintawkna kan nei," a ti. Thawhlehni zing dar 4:30-ah Game 1 an khel ang.

Inkhel dangah San Antonio Spurs chuan Memphis Grizzlies lakah 103-96 in hnehna an chang ve bawk. Spurs hian series 4-2 in an la a, conference semifinal-ah Houston Rockets an hmachhawn leh ang.