Tottenham hnuaiah Arsenal?

Pathianni zan dar 9:00 hian White Hart Lane-ah Premier League inkhel ngaihven hlawh khelh a ni awm dawn. North London derby vawi 184-na khel turin Tottenham Hotspur chuan Arsenal an lo mikhual dawn a ni.

Spurs hian hnehna an chang a nih chuan kum 1994-1995 season hnua a vawi khat nan an hmelma club chunga awm chungin season an khar dawn tih a chiang ang. Elpui leh hmelma ni bawk laka tlawm duh lo pahnih inkhel tur hi boruak a dai thei lo.

Tottenham hi champion tum an ni a, an mikhual tur Arsenal erawh season thara Champions League khelh tum an ni! Spurs hian point 74 hmu tawhin league hmahruaitu Chelsea chu point liin an phak lo mek, Gunners hian point 60 an hmu tawh thung, an inkarah point 14 a awm.

Poch a fimkhur

Tottenham hian an league match hnuhnung berah Christian Eriksen-a goal hmangin Crystal Palace chu sikhat faiin an hneh. Palace laka hnehna an chan hnuah Mauricio Pochettino-a zawhna dawn langsar tak pakhat chu season tawpa Arsenal chunga awm leh awm loh chungchang a ni.

Spurs manager a ṭawng fimkhur hle, Pochettino chuan, "Phur vak hun a ni lo a, thildang aia buaipui bik tur a ni hek lo. Arsenal chunga awm ringawt kan ngaihtuah thei lo, kan tana chona pawimawh zawk chu Chelsea nen kan inkar tih zim hi a ni," tiin a sawi.

Argentine manager chuan sawi chhunzawmin, "Kan tum ber chu hnehna chan a ni a, nomawi lian chawi tur chuan rilru huaisen neih a ngai. Hlawhtling tur chuan suangtuahna ṭha leh beiseina kan neih a ngai bawk a ni," a ti.

Pochettino kaihhruaina hnuaiah Spurs hi Premier League team hmuhnawm berte zinga mi an ni mek a, season kal laia tlarhnung pui ṭha ber niin an lamah goal 22 bak a la lut lo. Defender Danny Rose chu a khup hliam a dam hnuah training a zawm leh tawh a, Erik Lamela leh Harry Winks te erawh hliam vangin an chhawr thei dawn lo chiang.

Tottenham hian tlarhmaah Harry Kane an nei, England international striker hian North London derby a khelh hnuhnung pahnihah goal a khung ve ve. Kane bakah hian rawlthar duhawm Dele Alli, Eriksen leh Son Heung-min te hi EPL season kal laia player hriam berte zinga mi an ni.

Laipui puak dawn?

Arsenal manager Arsene Wenger-a'n season duhawm lo a hman hliahkhuh nan Champions League khelh ngei a tum a, tun hnaiah 3-4-3 formation hmanga a naute remkhawmin harhtharna an chang mek. Tlarhnunga player pathum dah chung hian an match hnuhnung pathumah hnehna an chang.

Kum 67-a upa Wenger hian an tan point hloh a thian loh thu a sawi nawn fo tawh a, Nilaini zana Leicester City an hneh ṭum pawhin hun tawp lamah chuan tlarhmaah player pali - Dany Welback, Olivier Giroud, Alexis Sanchez leh Mesut Ozil te a dah lut. Gunners hian hun tawp dawna Foxes defender Robert Huth-a own goal hmangin hnehna an chang hram.

French manager chuan, "Leicester City lakah khan goal khung kan tum tih a chianna chu hun tawp lama ka naute ka rem dan kha a ni. Inkhel zawng zawngah 0-0 ni chunga tawp kan duh tawh lo, point thum hmuh zel kan duh. Foxes kan hmachhawn ang bawk khan Spurs lakah pawh a danglam chuang lo ang," a ti, chak loh a sawi ri duh tawh lo.

Arsenal hian malpui na vangin Shkodran Mustafi an la chhawr thei dawn lo a, captain Laurent Koscielny-a'n Foxes lakah hliam tenau tuar mah se Spurs a hmachhawn theih beisei a ni. Lucas Perez, David Ospina leh Alex Oxlade-Chamberlain ten team training an zawm leh vek tawh bawk.

Premier League - Fixtures
Zanin Inkhel Tur
Southampton 7:30 PM Hull City
Stoke City 7:30 PM West Ham United
Sunderland 7:30 PM AFC Bournemouth
West Brom 7:30 PM Leicester City
Crystal Palace 10:00 PM Burnley
April 30, Pathianni
Manchester United 4:30 PM Swansea City
Everton 6:35 PM Chelsea
Middlesbrough 6:35 PM Manchester City
Tottenham Hotspur 9:00 PM Arsenal
May 1, Thawhtanni
Watford 12:30 AM Liverpool