Reds U18 coach Gerrard

Liverpool chuan club legend Steven Gerrard chu Reds Under 18 coach tura ruat a nih thu an tichiang ta. Liverpool chanchina player ropui ber ang hiala chhal ngam hian U23 team enkawl tur Neil Critchley hmunruak a luah dawn a ni.

Liverpool tan match 710 khela goal 186 khungtu midfielder chuan naupangte rilru puthmang thlak a tum thu sawi nghalin, "Tam tak chuan 'in show' hi an chak tlat a, ball chawh kual leh Cruyff turn tih vel hi hlawhtlinnaah an ngai. Skill leh talent chu en kan theih a ni lo ngei a, mahse hemi piah lamah hian thil tam tak a awm a ni," a ti.

No Ronaldo!

England tana match 114 a khelha vawi 38 captain ni thei Gerrard chuan, "Naupang tam tak hi chuan Cristiano Ronaldo ang nih kher hi an tum a, a pawimawh ber erawh an chakna leh chak lohna lai an inhriat hi a ni," a ti.

Reds tana nomawi liantham pariat ngawt chawitu chuan, "Kan naute hi awihawm loh khawpa academy ṭhaa inzir an nih avangin an beiseina a sang em em ṭhin a, tam tak chuan hlawhtlingah an inngai nghal ngawt ṭhin. Mahse, chona tak tak chu he academy aṭanga an inzirchhuah hunah a in ṭan dawn chauh a, chu chona hmachhawn tura inpeih tur chuan puih ka tum a ni," tiin tih mai mai a tum lo.

Zirlai Gerrard

Gerrard hian U18 coach dinhmun a chelh hma hian academy-a coaching staff zingah hun a hmang tawh a, LA Galaxy aṭanga football chawlhsantu chuan, "Thil tam tak ka zir chhuak tawh a, Liverpool academy director Alex Inglethorpe nen kan inbiak hnuah U18 ka enkawl hi a hun ve tawhin kan hria a ni," a ti.

Inglethorpe chuan, "Steven hian he hmun a rawn pan hnuah hian a tawnhriat leh thiamna hmangin nasa takin min pui a, hma kan sawnpui nasa em em. Chuvang chuan a coaching career zel tur atan tuna kan thutlukna hi tih ngei ngai niin kan hria a ni," tiin club captain hlui U18 coach tura an ruat chhan a sawi.