Junior Football semi-ah Mizoram

Nimin tlai National Junior Football Championships (BC Roy Trophy) group stage-ah Mizoramin Delhi 2-0 in an hneh a, an group inkhel pakhat zawkah Uttarakhand-in Jharkhand 3-0 a an hneh avangin match hnih khelh lek aṭangin semifinal an lut.

BC Roy Trophy-ah Mizoramin an match hmasa berah Uttarakhand 5-0 in an hneh tawh a, group khat aṭanga pakhat chauhin semifinal lut tur a ni nachungin knockout stage lut turin harsatna an tawk lo.

Bhillai, Chhattisgarh-a inkhelah Mizoram tan Lalruatfela'n minute 43-naah ding lam aṭangin Delhi keeper position dik tawk lo hmufuhin a pet goal a, minute 83-naah Lalremmawia'n vei lam aṭanga la lutin keeper vei lamah mawi taking a khung leh bawk.

Mizoram manager Hming-thansanga chuan, "Ni a sat avangin kan player-te an hah lutuk a. Kan beisei ang game an khel chhuak pha lo a, chutih rualin hun rei tak kan inbuatsaihna kan hlawk pui a, a tawpah hnehna kan chang leh mai ṭhin," tiin Vanglaini palai a hrilh.

April 30, Pathianni khian Mizoramin an match hnuhnung berah Jharkhand an hmachhawn ang. Semifinal hi May 3-ah khelh tur niin Mizoram hian Group D team pali Assam, TamilNadu, Goa leh West Bengal te zinga che ṭha ber an hmachhawn ang.