Manchester-ah chak zawk an awm lo

Manchester United manager Jose Mourinho-a'n Derby khelh a nih hmain Premier League aiin an champion theihna tur Europa League an ngaih pawimawh zawk thu a sawi a, Portuguese manager hian a sawi lawk ang ngeiin Etihad Stadium-ah goal khung tum aiin a venhim lam a thlang zawk - City nen goal khung loin an inhnehtawk.

Pep Guardiola leh a nauten Etihad Stadium-ah inkhel thunun mah se a pawimawh ber goal an khung thei lo a, point khatah an lungawi a ṭul. Manchester khaw club pahnih an inhnehtawk avangin Champions League khelh inchuh boruak a nung sawt a, club pahnih bakah hian Liverpool leh Arsenal chu season thara Europe-a inlan beisei zingah an la tel.

Mourinho chakna

Derby-ah goal khung loin team pahnih inṭhen mah se Mourinho-a'n point khat bak duh loin a naute a remkhawm tih a chiang a, point thum hlawh lo mah se a game plan a hlawhtlinpui miau avangin Pep aia hlim zawk tur a ni. United hian 30.8% chiah ball an chang a, mumal taka statistics record season 2003-04 hnua match khata ball an chan tlem ber ṭum a ni.

United tan Michael Carrick chu midfield-ah roreltu a ni a, City goal nawr tur dang chattu a ni. Tlarhmaah rawlthar duhawm Marcus Rashford leh Anthony Martial inkawp mah se ball an hmuh ṭhat miau loh avangin City tlarhnung an rum ṭhaih thei lo - United hian inkhelh chhung zawngin vawi thum chiah City goal zawnah an pet!

Tlarhma bil City?

Manchester City-in goal khung ngei tumin goal-ah vawi 19 ngawt an pet a, goal zawna an pet erawh vawi ruk chiah a ni! City tan Sergio Aguero-a'n post a pet per chu goal teuh ber a ni a, minute 86-naa tlan luhtir Gabriel Jesus goal khung chu offside vangin pawm a ni lo a,ṭul lo takin Marouane Fellaini-a'n Aguero a tauh avangin minute 84-naah hnawhchhuah ni mah se City hian an tam an chhawr thei chuang lo.

City tana chanchin lawmawm lo dang chu Claudio Bravo inhliam a ni. Kum 34-a upa keeper hi minute 79-naah lakchhuah a ni a, Pep chuan tun season-ah a keeper chu a inlan leh theih dawn leh dawn loh a hriat loh thu a sawi. Match li khelh tur la nei City tana thu lawmawm erawh Vincent Kompany a lo kir leh tawh a, kum 31-upa defender hoin City tlarhnung an inringtawk sawt tih hmuh hmaih theih a ni lo.

Theihtawp chhuahin...

United boss Mourinho chuan, "City hi chuan top four-ah season an khar ka ring, a bak hmun ruak hi chu Arsenal leh Liverpool-te nena kan inchuh tur a ni ang. Theihtawp kan chhuah dawn a, kan hriatreng tur erawh Europa League semifinal-in min hmuak a, players inhliam kan nei nual bawk. Mahse, theihtawp kan chhuah ang," a ti.

City boss Pep chuan, "Kan kutah engkim a la innghat a, chu chu a pawimawh lai chu a ni. United nena kan inkhelh ang hian match zawng zawngah theihtawp chhuah a ṭul dawn a, minute tawp ber thlengin a hautak ang. Mahse, vawiina kan beih ang khan season tawp thlengin kan bei dawn a ni," tiin Champions League khelh ngei a tum.