Bawihte, ka lo haw e - Lukaku
Chelsea striker lungleng Romelu Lukaku chu a duhna hmunah tak a kir leh ta a, "Bawihte, ka lo haw e," tiin Inter Milan chu season khat chhung atan loan-in a zawm.
Season hmasa ṭan dawn khan Chelsea hian an club player man to ber ni turin, pound maktaduai 97.5-in Lukaku hi an lalut a, beiseina pawh an nei sang hle.
Mahse, December thla khan Lukaku hian Chelsea-a a hlim loh thu a sawi chhuak a, Inter-a kir leh a beisei thu thlengin a sawi - a duh ang takin thil a thleng a, Serie A club player a ni leh ta.
Inter hian loan-a Lukaku an lak manah hian pound maktaduai 6.9 an seng dawn a, a ngheta lakluh theih dan tur contract-ah ziah a awm lo.
Beisei phak lo
Lukaku-a'n Inter-a a hun hmasaah match 95 khelin goal 64 a khung a, Serie A nomawi a chawipui bakah Europa League final a khelhpui a, 2020-21 season khan Serie A most valuable player-ah thlan a ni.
Chelsea-in an striker hlui hi Stamford Bridge-a thlem luh dan an ngaihtuah zui. Inter tan £97.5mtd an thehchhuah piah lamah, Belgian striker hi kar khatah £325,000 an hlawhtir a, kum nga chhung atan contract an ziahpui.
Mahse, Chelsea beisei angin Lukaku a che lo - season hman zawh takah khan inelna hrang hrangah match 44 khelin goal 15 chiah a khung a, league-ah match 26 khelin goal riat a khung.
Lukaku man leh a hlawh zat chhutin a goal khung zat a tlem a, a man aṭanga tehin a goal khat khung kha £6.5mtd man ang zel a ni - a tam lutuk hret!
Lukaku hian December thla khan Blues manager Thomas Tuchel hnuaia a khelh danah a lawm tawk loh thu a sawi chhuak a, Inter-a kir a hreh loh thu thlengin a sawi chhuak.
Hmangaih hmasa
Lukaku-a'n a chet ṭhat loh karah Inter a ngai a, ngawi mai mai tura ngaih a nih laiin Krismas hma khan Inter a ngaih thu a sawi a, coach Thomas Tuchel hnuaia a chanvoah a hlim tawk loh thu a sawi bawk.
Belgian striker hian a hnuah ngaihdam dil mah se Inter a ngaihna erawh a dai hlen lo a, Blues-a a season tawp lama a league match hnuhnung 15-ah goal thum chiah a khung bawk si nen chhuak tur anga sawi zui a ni.
Mahse, kar khata Lukaku hlawh, £325,000 hi sum dinhmun ṭha lo Inter tan a tam hret. Belgium international hian San Siro-a a kir theihna tur a nih chuan a hlawh tihhniam thlengin a huam zui a, mahse, Inter-in a ngheta lalet turin pawisa an la nei lo cheu!
Kar hmasa khan Inter president Steven Zhang chu Lukaku lalet tura indawrnaah a inrawlh ta hial a, a tawpah loan fee chawi chungin an inhawh let thei ta - Chelsea, Inter leh Lukaku an hlim vek.
Ka lo haw
Inter president Zhang chuan, "Ka hlim takzet - big boss chu a lo kir leh ta a, hun hlimawm taka kir leh ang mai kan ni," a ti a, a striker chungah beiseina sang tak a nei.
Lukaku chuan, "Mahni ina lo kir leh ang mai ka ni. Inter hian thil tam tak min tihsak a, a hma zawng aia hna ka thawh ṭhat lehzual ka beisei.
"England ka pan pawh khan he khawpuia ka in kha ka chhuahsan reng reng lo - chu chuan lo kir leh tura ka hlimzia a pholangin ka hria," a ti.
Lukaku hian 2011-14 inkar kha Chelsea-ah hun a lo hmang tawh a, season hmasaa London club-a a kir khan mahni ina haw ang maiin tam takin an lawm a, a in tak erawh Italy zawk a lo ni e.
Hello Inzaghi
Lukaku hi London khawpuiah a lung a leng ṭhin hle niin a lang - Inter-a kir tur anga sawi a nih khan Italian media-te chuan Inter coach Simone Inzaghi pawh phone hmanga bia angin an sawi a, Inter-a kir tura a tih tur a zawt tih thlengin an sawi!
Belgian striker chuan Inter-a a kir chhan sawiin, "Fans leh teammate te min duhsakna hi ka ngaihlu a, coach nena thawhdun ka chak bawk - season hmasa khan kan inbe reng ṭhin a ni," a ti a, Italian media lamin an sawi dik niin a lang.
Nerazzurri (Inter sawina) hian season tharah Serie A nomawi chawi ngei an duh - Juventus chhuahsantu Paulo Dybala pawh Lukaku hma hian an dawr a, mahse, Lukaku dawrna lama an insawrbing avangin Argentine forward dawrna hi an chawlhsan lailawk.
Dybala hi AC Milan nen pawh sawizawm a ni a, Inter hian lalut ta lo pawh ni se Lautaro Martínez an la neih tho avangin, Lukaku neih belhtu Inter tlarhma hi Serie A club tlarhnungten hmachhawn an châk lo ang.