NT-a'n nuai 3 chuang a hlawh
Mizo television channel Zonet chuan WBC Asia continental title fight-a pay-per-view kaltlanga an sum hmuh dan puanzarna an nei a, Mizo boxer NT Lalbiakkima chuan fight purse aṭanga a pawisa dawn nen cheng nuai thum chuang a dawng.
Zonet puanzarnaa a lan danin television leh online (Zonet Empai) kaltlanga inhnek entute aṭanga Zonet sum hmuh chu Rs. 6,62,900 a ni a, TV kaltlanga an sum hmuh hi Rs. 5,30,900 a nih laiin Empai aṭanga an sum hmuh chu Rs. 1,32,000 a tling.
Zonet chuan title fight neih a nih hma khan PPV aṭanga an sum hmuhte sem darh dan tur an puang lawk sa a, an puan lawk ang ngeiin an sem chhuak ta a, a hlawkna teltu langsar chu Mizo boxer-te an ni.
NT-a sum dawn
Sheikh AL Maktoum Hall, World Trade Centre, Dubai-a inhnekah khan NT-a'n hnehna a chang zo lo a, Philippines boxer ṭha Jayson Vayson hmaah split decision (97-94, 93-97 & 96-94) in a tlawm.
Mahse, Siaha boxer sum dawn erawh a kiam phah lo. NT-a hian fight a neih avang khan fight buaipuitu DJMC aṭangin $3,000 (Rs. 2,36,848) a dawng sa a, PPV-ah hian 10% changin Rs. 66,290 a dawn belh.
NT-a'n Dubai-a fight a neih aṭangin Rs. 3,03,138 a dawng tihna a ni a, amah ang thoa Mizo boxer inlan Laldingliana chuan DJMC aṭangin Rs. 1,18,424 a dawng a, PPV aṭangin 5%, Rs. 33,145 a dawng bawk - a sum dawn zawng zawng hi Rs. 1,51,569 a ni.
PPV sem dan
Pay-per-view aṭanga sum hmuh hi boxer chauhin an insem lo. Title fight buatsaihtu DJMC chuan 70% an chang a, Rs. 4,64,030 an dawng - anni hian boxer leh anmahni kalpuitute kal man, hotel thlen man, lawmman dawn zawng zawng an tum vek.
Hetihlai hian Zonet chuan 15% an chang ve bawk a, anni sum dawn zat hi Rs. 99,435 a tling. Zonet hian Mizo mipuite en theih tura inhnek live-a an chhawpchhuah bakah, a tihlarna kawngah nasa takin hma an la bawk.
NT-a chuan, "Hmanhmawh taka fight ruahman a nih angin tihlarna hun a tam tawk lo a, chuti chunga kan sum hmuh ngaihtuah hian a lawmawm ka ti a, kan beisei aiin a tam zawk a ni," tiin Vanglaini a hrilh.
Rematch chu
NT-a hi a hneh zawh tak loh Jayson nen rematch nei leh turin an inbe fel tawh a, NT-a te inhnek buaipuitu Roshan Nathanial chuan rematch hi October-a neih a nih tur thu Vanglaini a lo hrilh tawh.
Siaha boxer NT-a chuan, "Mizo mipuiten kan fight min ngaihhlutsak a, an zarah sum dawn tur pawh PPV kaltlangin kan neih belh ṭhin. Mizo mipui chungah lawmthu ka sawi a, kan fight neih leh turah pawh theihtawp min chhuahpui turin ka sawm a ni," tiin Vanglaini a hrilh.
Ruahman dan chuan NT-a leh Jayson hi October thla tawp lama inhnek tura tih an ni a, Aizawlah nghah an tum - chutihrual chuan tihfel ngai tam tak a awm a, a hun leh a hmun hi la sawn leh theih a ni.