British tleirawl Raducanu a tla
Emma Raducanu inkhel en turin British tennis fans chu Centre Court khat tlatin an pungkhawm a, kum 100 zeta upa stadium chhunga inkhel entuten an fanu rangkachakin hnehna a chang lai hmuh an duh - mahse, Caroline Garcia ngam loin a zinkawng a tawp.
Nilaini zan second round inkhelah, kum 19 mi Raducanu hian Garcia hi 6-3, 6-3 in a ngam lo. Darkar khat leh minute 26 an inkhelh chhungin Raducanu a chungnung hleithei lo, winners vuak chhuah a harsat avangin a dingchang thei lo a ni.
Inkhelh ṭan hmain Garcia chuan, "Raducanu hi chu khawvel huapa lar leh ṭha, mite ngaihsan a ni," tiin a khingpui tur a fak. An inkhelh tak taknaah erawh kawng engkimah a chungnung zawk a, hlauhthawn vak lai nei loin a chak.
A pawm thiam
Fans lamin ṭan viau mah se an lawmna a siam thei lo a, amaherawhchu a chak lo chu Raducanu-i'n a pawm thiam. British tleirawl chuan, "A nihna takah chuan eng inkhel pawh ni se chak loh hi chu pawm thiam a harsa ṭhin.
"Mahse, ka chak lohna hi ka pawm thiam, fans chauh ni loin keimah ngei pawhin ka beisei angin ka khel phak lo," tiin a khel ṭha tawk lo tih a pawm. Hliam tenau vangin inbuatsaihna a nei ṭha tawk lo a, tournament takah a tuar ta a ni.
Raducanu a che ṭha lo tih chu a chiang, chutih rualin Garcia hian fak a phu. French nula hian Centre Court-ah match ruk a khelh tawhah chak loh a la nei miah lo, a tan chuan Wimbledon khelhna hmunpui ber hi thil thar a ni ve lem lo.
Beiseina nung
Khawvel barakhaihin US Open nomawi a chawi a, a naupan deuh laia a inkhel hmutu British mite erawh chuan Raducanu theihna an hriat avangin mak an ti vak lo. Mahse, media lamin khawveka ṭha ber leh chungnung ber tur ang maia an cheibawlna boruak erawh a la zo lo deuh.
Seeded 10-na Raducanu chuan, "French Open hnu lamah khan ka inkhel tlem hle. A nihna takah chuan Wimbledon hma khan grass court-ah game ruk chiah ka khel, duhthusama inbuatsaihna ṭha lo chu a takah a pawi thui ṭhin.
"Ka tawpna tur erawh a ni lo. Hliam leh harsatna dangin min tlakbuak lo a nih chuan a ṭha thei ang bera tennis khelh chhunzawm leh ka tum dawn," a ti. Grand Slam pathum a khel zo a, tunah chuan US Open atan rilru a pe chhunzawm ang.
Kontaveit a tla
Seeded pahnihna Anett Kontaveit a tla. Second round inkhel dangah world number 97 Jule Niemeier chuan Kontaveit hi 6-4, 6-0 in a hneh a, tun inelna neih laia hmeichhe huang bika tla tawh zingah chuan ranking sang ber a ni.
Beisei loh result dang pawh kan hmu. Tun hma lama champion tawh Garbine Muguruza chu Greet Minnen lakah 6-4, 6-0 in a chak lo; Spanish star hian 2017 khan Wimbledon title hi a lo la tawh, kuminah erawh a puanthuah a tel hma hle.
Champion tura rinkai ni phak, seeded parukna Karolina Pliskova, seeded pangana Maria Sakkari leh 2018 champion Angelique Kerber te erawhin an khingpui ṭheuh an hneh a, world number 1 Iga Swiatek chu a match hmasa berah a lo chak tawh bawk.